Segiz jyldyqtan soń kásiptik-tehnıkalyq ýchılıshege oqýǵa túsip, traktorıst-mashınıst mamandyǵy boıynsha támamdaǵan Balqash aýdanynyń týmasy Baqtyǵalı Dáýitbaevty jerlesteri «segiz qyrly, bir syrly» azamat dep biledi.
Oǵan sebep kóp. Otan aldyndaǵy azamattyq boryshyn ótep kelgennen keıin óziniń aq mekeni Aqdala aýylynda mehanızator bolyp eńbek jolyn bastaǵan Baqtyǵalı atalǵan keńsharda ártúrli jumystar istep, eńbekqorlyǵymen tanylǵan. Budan soń bala kúnnen qolyna qalam ustatqan aqyndyǵy men ıyǵyna ilgen fotoapparaty shyǵarmashylyqqa jeteleıdi. Aýdandyq «Balqash óńiri» gazetine operator, fototilshi, 2009-2016 jyldar aralyǵynda Taldyqorǵan qalasyndaǵy «Jetisý» telearnasynda shtattan tys operator bolyp ta qosymsha jumys istegen Baqtyǵalı Dáýitbaev Qazaqstan Jýrnalıster odaǵynyń múshesi, D.Qonaevtyń týǵanyna 110 jyl tolǵan merekelik medaliniń ıegeri atanǵan talant ıesi.
Onyń qalamynan týǵan «Kıeli meken», «Kókjıde altyn besigim», «Qazaqstan barystary», «Alataýdaı asqarly», «Naýryz», «Jan anam», basqa da óleńderine sazgerler án jazǵan. «Táýelsizdikke-30 án» oblystyq baıqaýǵa qatysyp, tańdaýly 7 aqynnyń ishinde top jarǵan «Táýelsizdik – máńgilik» atty óleńine án jazylyp, mádenı is-sharalardyń ózegine aınalǵan. Baqtyǵalıdyń Dinmuhamed Qonaevqa arnaǵan óleńine jazylǵan án de osy kúni Balqash jurtynyń júreginde jattalǵan desek asyra aıtqandyq emes.
О́nerli azamattyń taǵy bir qyry – búgingi kúnge deıin jınaǵan qalamsaptarynyń sany 1400-ge jetipti.
«Meniń kolleksııamdaǵy qalamdardyń deni shytyrlaq qalamdar. 2004 jyldan bastap jınap kelemin. Qalam jınaýǵa degen qyzyǵýshylyǵym bala kúnnen bastalǵan. О́zim óleń jazatyn bolǵan soń qalamsapty basqa dúnıeden artyq kóremin. Qalamdarymnyń arasynda Olımpıada chempıony Jaqsylyq Úshkempirovtiń jáne balalar jazýshysy Álı Ysqabaevtyń qalamdary bar», degen Baqtyǵalı Dáýitbaevtyń qalamsaptar qorjyny bıylǵy jyly 18 qalammen tolyǵypty. Onyń ishinde ekeýin uly Bekarys Ispanııa memleketine barǵanda arnaıy satyp ákelgen bolsa, kúıeýbalasy Ersinniń de arnaıy tapsyryspen jasatqan qalamsaby erekshe kóz tartady.
Osyndaı qasıetterimen daralanǵan Baqtyǵalı – memlekettik tildiń birden-bir janashyry. Ol ana tilimizdiń mártebesin kóterip, óz tuǵyryna qonýyna únemi atsalysyp, qısyq-qyńyr jarnamany kózi shalsa kemshiligin aıtyp, syn-eskertpe jasaýdan jasqanbaıdy, onyń oryndalýyn qadaǵalaýdy da ultjandy azamattyń ózine mindettep alǵany ańǵarylady.
Boıyna kisilik pen kishilik, eńbekqorlyq syndy asyl qasıetterdi sińirip, adam qyzyǵarlyq birqatar ónerdi arqalap júrgen Baqtyǵalı Dáýitbaev úlken shańyraqtyń ıesi, jeti balanyń ákesi. О́mirde ózine qoldaý bildirip, shyǵarmashylyǵyna demeý bolyp júrgen aıaýly jary, «Altyn alqa» ıegeri Maıra Oqasova ekeýiniń ul-qyzdary eseıip, aldy otaý quryp úlgergen. Baǵy men baby úılesken shańyraqta búginde baldaı tátti nemereler ósip keledi.
Almaty oblysy