Bıyldan bastap qaıta berile bastaǵan «Qazaqstannyń halyq ártisi» qurmetti ataǵymen bir top ónerpaz marapattaldy, dep habarlaıdy Egemen.kz.
Ulttyq mereke – Respýblıka kúni qarsańynda Prezıdent Qasym-Jomart Toqaevtyń Jarlyǵymen elimizdiń áleýmettik-ekonomıkalyq, mádenı-rýhanı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi men belsendi qoǵamdyq qyzmeti úshin bir top azamat memlekettik nagradalarmen marapattaldy. Solardyń qatarynda «Qazaqstannyń halyq ártisi» qurmetti ataǵyn ıelengen tulǵalar da bar.
Sonymen «Qazaqstannyń halyq ártisi» ataǵy bıyl elimizdiń kórnekti mádenıet qaıratkerleri, teatr jáne kıno akterleri D.Ahımovqa, M.Tokarev pen D.Aqmoldaǵa, opera ánshileri Sh.Ábilov pen T.Kúzenbaevqa, ataqty ánshiler R.Stamǵazıevke, D.Qudaıbergenge jáne kúıshi A.Úlkenbaevaǵa berildi.
Budan buryn habarlaǵanymyzdaı, búgin «Qazaqstannyń halyq jazýshysy» ataǵyn ıelengen qalamgerlerdiń de esimi belgili boldy.