Astana qalasynyń ákimi Jeńis Qasymbek qurylysy uzaqqa sozylǵan turǵyn úı keshenderiniń úleskerlerimen kezdesti. Bul týraly ákim Instagram paraqshasynda jazdy, dep habarlaıdy Egemen.kz.
Qala basshysy qurylysy uzaqqa sozylǵan birqatar nysannyń qurylys barysymen tanysqanyn jazdy. Olar – «Terrıtorııa komforta-1» 2-kezek, «Trıýmf Sıtı», «Future home» turǵyn úı keshenderi.
Aıta ketsek, mundaǵy úleskerlerdiń jalpy sany – 800-ge jýyq otbasy.
«Mselen, «Terrıtorııa komforta» turǵyn úı kesheniniń qurylysy osydan 20 jyldaı ýaqyt buryn bastalǵan. Tehnıkalyq tekserý kezinde ǵımarattyń apatty jaǵdaıda ekeni anyqtaldy. Tıisinshe apatty kúıdegi turǵyn úı kesheniniń barlyq blogyn buzý boıynsha aýqymdy jumys júrgizildi. 2021 jyly «Terrıtorııa komforta» TK birinshi kezeginiń qurylysy aıaqtalyp, 100-den astam úlesker otbasy páter kiltin alǵan. Qalǵan bloktar boıynsha jumys júrip jatyr», dep jazdy Jeńis Qasymbek.
Budan basqa, «Trıýmf Sıtı» men «Future home» turǵyn úı keshenderiniń qurylysy 10 jyl buryn bastalǵan edi. «Future home» turǵyn úı keshenin ótkizý kezinde 4 jáne 7 qabaty ǵana salynǵan.
«Bıyl qurylysy uzaqqa sozylǵan 30 turǵyn úı keshenin aıaqtaýdy josparlap otyrmyz. Olardyń bir bóligin qazirdiń ózinde aıaqtadyq. Úlestik qurylys nysandary boıynsha qadamdyq is-shara jospary bar. Qurylysy uzaqqa sozylǵan nysandardyń aıaqtalýy Memleket basshysynyń tikeleı baqylaýynda», dep qorytyndylady Jeńis Qasymbek.