Qazirgi Sátbaev ındýstrııa kolledji buryn №3 kásiptik mektebi dep atalatyn. Basshylyq jumys suraı kelgen buǵan dánekerleý mamandyǵy boıynsha úsh aılyq kýrsqa barýǵa usynys jasady. «Bizde osy mamandyq boıynsha oqý sheberleri jetispeı jatyr. Eger bári jaqsy bolsa, jumysqa qabyldaımyz, balalarǵa dánekerleýdiń qyr-syryn úıretýden dáris beresiz», deıdi. Munyń bitirgeni – Jezqazǵan qurylys tehnıkýmy. Mamandyǵy boıynsha jumys tabylmaı tursa, qaıtpek kerek?
Sondyqtan ol kásiptik mektep basshylyǵynyń usynysyn qup kórdi. Sóıtip, jańa mamandyqty meńgerýge umtyldy. Dánekerleý mamandyǵyna sol mekteptiń ózinde oqytady eken. «Oqýshylarǵa qurylys mamandyqtarynyń birinen sabaq beremin» dep kelgen ol solarmen birge dánekerleýshi mamandyǵyna mashyqtandy. Bul 2007 jyl bolatyn. Ol bul kezde úsh balanyń anasy atanǵan otyzdyń bel ortasyndaǵy kelinshek edi. Synaqtardan súrinbeı ótti. Aınalasy úsh aıdyń ishinde kóp-kórim dánekerleýshi bolyp aldy. Búgin endi Mýkarama Baıshorına Sátbaev ındýstrııa kolledjinde óndiristik oqytý sheberi bolyp eńbek etip júr.
– «Eshqashan eshteńeniń keshtigi bolmaıdy», degen ras eken. Jasym otyzdyń ortasyna kelgende jańa mamandyqty ıgeremin dep oılaǵan joqpyn. Biraq buǵan esh ókinbeımin, – deıdi ol.
О́ıtkeni osy jyldar ishinde qanshama dánekerleýshini oqytyp, úıretip shyǵardy. Kolledjge kelgende dánekerleý degennen túk habary joq jastar aınalasy eki-úsh jylda mamandyq ıesi bolyp shyǵady. Olardyń oqyp, úırenýine kolledjde jaqsy jaǵdaı jasalǵan. Arnaıy sheberhanada oqýǵa qajetti qural-jabdyqtar jetkilikti. Oqý barysynda teorııa men praktıka ushtastyrylyp otyrylady. Bolashaq dánekerleýshiler qaladaǵy irgeli kásiporyndarǵa baryp tájirıbe jınaqtaıdy.
– Biz únemi oblystyq, respýblıkalyq baıqaýlardan syrt qalmaımyz. Mundaı baıqaýlardyń bereri mol. Bul bir jaǵy ózimizdi kórsetýge sebep, ekinshiden, ózgelerdiń ozyq dúnıelerin úırenemiz, – degen Mýkarama Tasybaıqyzy bıyl oblystyq deńgeıdegi baıqaýda oqýshylarynyń 2-oryn alǵanyn zor maqtanyshpen aıtty.
Eńbektiń baǵalanǵanyna ne jetsin? Mýkaramanyń bul oraıda da ókpesi joq. Ol 2014 jyly Sátbaev qalasy ákiminiń arnaıy syılyǵyn jeńip alsa, 2021 jyly ol kezdegi Bilim jáne ǵylym mınıstriniń Alǵyshatyn ıelendi. Al jaqynda «Amanat» partııasynyń marapatyna ıe boldy. Bul aıtylǵandar onyń marapattarynyń birdi-ekisi ǵana.
Mýkaramanyń aıtýynsha, áıelderdiń dánekerleý mamandyǵy boıynsha ustazdyq etýi tańǵalarlyq jaǵdaı emes. О́ıtkeni ózi eńbek etetin kolledjdiń ózinde ǵana úsh áıel osy mamandyq boıynsha sabaq beredi eken.
Mýkaramanyń aldynan ótken dánekerleýshiler «Qazaqmys» korporasııasynyń qurylymdarynda, taǵy da basqa mekemeler men kásiporyndarda eńbek etedi. «Shákirtterimmen maqtanamyn. О́ıtkeni olar elimizdiń damýy úshin óz úlesin qosyp júr. Shákirtterimniń eńbek jetistikterinde meniń de azdy-kópti úlesim baryn sezemin, bul da janǵa jylýlyq syılaıtyn sát», degen Mýkarama Baıshorına otbasynda ardaqty ana, aıaýly áje, ónegeli ene.
Ulytaý oblysy,
Sátbaev qalasy