Ánshi Oljas Abaı men aktrısa Darıǵa Badyqova «Taptym-aý seni» fılminiń saýndtregi retinde jazǵan «Sezim úshin» ániniń ǵalamtordaǵy qaralymy bes-alty kúnniń ishinde 1 mıllıonnan asty. Tyńdaýshy qaýymnyń júreginen oryn tapqan týyndynyń sózin aqyn Aqberen Elgezek jazsa, sazy Talǵat Lestiki. Án qalaı ómirge keldi? Atalǵan týyndyǵa qatysty sazgerdiń pikirin suradyq.
«Bul 2019 jyly jazylǵan án. 2021 jyly ánshi Ǵazızhan Shekerbek oryndap shyqqan edi. Ándi stýdııada árlep, óńdep jazǵan soń Meırambek Besbaev aǵamyzǵa usyndym. Ol kisi budan basqa taǵy bir ánimdi de qabyl alyp oryndaıtynyn aıtty. Arada 2020 jyly karantındik shekteýden shyǵarmashylyq baılanys bylaı tursyn, «baıtal túgil bas qaıǵy» boldy ǵoı. Keıin Meırambek aǵamyz Ǵazızhan Shekerbekke usynyp, sol ánshi oryndap shyqty.
Endi mine, fılmniń izashary (saýndtrek) retinde jazylyp, tyńdaýshy qaýymnyń ystyq yqylasyna bólendi. Ánniń beınebaıany da ǵalamtorda kóp qaralypty.
«Sezim úshin» ániniń o bastaǵy mátinin aqyn Qalqaman Sarınnyń kitabynan alǵan edim. Bertinde Aqberen Elgezekke Meırambek Besbaev ándi tyńdatyp, qaıta sóz jazsań degen usynys aıtqan eken. Osylaısha aqyn Aqberen men sazger Talǵat arasyndaǵy tutasyp ketken baılanystan ásem án týdy dep oılaımyn. Ǵazızhan baýyrymyzdyń oryndaýynda da tyńdaýshynyń júreginen jol tapty dep sanaımyn. Darıǵa Badyqova túsirgen fılmniń saýndtregi retinde jazylyp, tyńdaýshy men kórermenniń mereıin ósirgenine qýanyshtymyn. Tipti bertinge deıin kóp adam «Sezim úshin» ániniń sazyn jazǵan Talǵat Les ekeninen de beıhabar boldy. Meniń uǵymymda án sazgerdiń qushaǵynan qalyqtap shyqqan soń halyqqa tıesili bolýy tıis. Tyńdarman joǵary baǵalasa, men úshin odan asqan baǵa da, aqsha da tipti marapat ta joq. Sondyqtan da án satyp qomaqty paıda tabý degen meniń tabıǵatyma jat. Aqberen Elgezek aqynmen de shyǵarmashylyq baılanysymyzdy damyta túsip, aldaǵy ýaqytta basqa da óleńderine án jazýdy kózdep júrmin», dedi sazger.