Jetisý óńirinde eń kreatıvti, bastamashyl jáne daryndy jastar tańdalmaq. Oblys ákiminiń jyl saıynǵy «Kóshbasshy-2023» syılyǵyna irikteý jáne usyný boıynsha ótinishter qabyldaý merzimi qarasha aıynyń 20-synan bastaldy, dep habarlaıdy Egemen.kz.
Qatysý sharttary men erejelerin Jetisý aýdandyq qoǵamdyq damý basqarmasy basshysynyń orynbasary Ilııas Tústikbaev pen «Jetisý jastary» KMM dırektorynyń orynbasary Jansaıa Smaǵulova baıandady.
Baıqaýda 14 pen 35 jas aralyǵyndaǵy jastar arasynda belsendilikti yntalandyrýǵa basty nazar aýdarylady. Bir jyl ishinde jastar saıasatyna eleýli úles qosyp, belgili bir jetistikterdi baǵyndyra alǵan, ózge jastarǵa úlgi oq boıy ozyq tulǵalarǵa erekshe kóńil bólinedi. Qujattar belgilengen erejelerge sáıkes 3 jeltoqsanǵa deıin qabyldanady.
«Bıyl «Úzdik jas qoǵam qaıratkeri», «Úzdik jas sportshy», «Úzdik stýdent», «Úzdik oqýshy», «Bilim jáne ǵylym salasyndaǵy úzdik jas kóshbasshy», «Úzdik jas otbasy», «Úzdik jas kásipker», «Mádenıet salasyndaǵy úzdik jas kóshbasshy», «Medısına salasyndaǵy úzdik jas kóshbasshy» jáne «Úzdik jas jýrnalıst» nomınasııalary boıynsha sen tur men ataıyndar anyqtalady. Nomınasııa jeńimpazy bolý úshin úmitkerler kórsetilgen salalarda jetistikke jetýi kerek. Sondaı-aq oblystyq, respýblıkalyq, halyqaralyq baıqaýlardyń jeńimpazdary, qoǵamdyq jumystarǵa belsene aralasyp, el alǵysyn alǵan jastar qatarynan kórinýi abzal. Úmitker syılyqqa usynylý úshin belsendi, bilimdi, kreatıvti oılaıtyn, bir sózben aıtqanda, naǵyz kóshbasshy bolýy kerek. Qatysýshylar qazirgi ýaqytta Jetisý óńirinde turyp, jumys isteýge nemese oqýǵa mindetti», dedi Ilııas Tústikbaev.
«Jetisý jastary» KMM dırektorynyń orynbasary Jansaıa Smaǵulova da bıylǵy jyldyń basty erekshelikteri - nomınasııalar barlyq salany qamtıtynyn, keıbireýleri biriktirilip, jańartylǵanyn málimdedi. Mysaly, «Úzdik jas qoǵam belsendisi» atalymy boıynsha jas saıasatkerler, jas memlekettik qyzmetshiler, volonterlar jáne úkimettik emes uıymdardyń jetekshileri baq synaı alady. Sonymen qatar «Mádenıet salasyndaǵy úzdik jas kóshbasshy» nomınasııasy jas ónerpazdar men aqyn-jazýshylardy qamtıdy. «Jas ustaz» jáne «Jas ǵalym» nomınasııalary biriktirildi, ıaǵnı bizdiń ustazdarymyz, magıstrlerimiz, dárigerlerimiz «Bilim jáne ǵylym salasyndaǵy úzdik jas kóshbasshy» úshin baqtalaspaq. Taǵy bir jańalyq, bıylǵy jyly ár nomınasııanyń jeńimpazy 500 myń teńge kóleminde syıaqy alady. Komıssııa quramyna da birqatar ózgeris engizildi. Qatysýshylar tek oblystyq deńgeıde ǵana emes, respýblıkalyq deńgeıde de komıssııa músheleriniń baqylaýynan ótedi. Aıta ketý kerek, ótinim qujattary baspa túrinde de, elektrondy túrde de usynylýy tıis.