Uzynaǵash aýylynda ornalasqan «Qamqorlyq ońaltý» ortalyǵyna elimizdiń ár túkpirinen densaýlyǵynda kináraty bar balalar kelip, em-shara qabyldaıdy. Olardyń árbirimen jeke-dara jáne toptar boıynsha mamandar ońaltý jumystaryn júrgizedi. Emdelýshi balalardyń tanym kókjıegin keńeıtip, kóńilin serpiltýdi maqsat etken Súıinbaı Aronuly ádebı-memorıaldy mýzeıiniń qyzmetkerleri jýyrda kóshpeli kórme uıymdastyrdy. Onda emdelýshi balalar aqıyq aqyn Súıinbaı atalarynyń mol muralarymen tanysty.
«Kórme jumysymen tanysqan balalardyń kóńil kúıi kóterilip qana qoımaı, ondaǵy qolóner buıymdary, er-turman, turmystyq zattar syndy tarıhı jádigerlerdi kórip, ózderin qyzyqtyrǵan saýaldarǵa jaýaptar alyp, qýanyp qaldy. Súıinbaı aqynnyń muralary balalarǵa oı salyp, erekshe áserge bólegeni sózsiz. Bul óz kezeginde qamkóńil balalarǵa zor qýanysh syılady. Sol úshin mýzeı qyzmetkerlerine rızashylyǵymyzdy bildiremiz», deıdi «Qamqorlyq ońaltý» ortalyǵynyń meńgerýshisi, bilikti dáriger Ásel Saýryqova.
Ortalyqta em alyp jatqan balalarǵa arnaıy Súıinbaı, Jambyl, Úmbetáli aqyndardyń shyǵarmashylyǵyn tanystyryp, aqyndar men batyrlar eliniń tarıhyn nasıhattaı kelgen Súıinbaı Aronuly ádebı-memorıaldy mýzeıiniń meńgerýshisi Aıaýjan Sádýaqasova mýzeı tarıhy jaıynda da túsinikti etip baıandap berdi.
«Meniń pirim Súıinbaı,
Sóz sóılemen syıynbaı.
Syrly sulý sózderi,
Maǵan tartqan syıyndaı», –
dep Súıinbaıdyń shákirti Jambyl atamyz jyrlaǵandaı, aqyndardan qalǵan áýezdi án-kúımen, jyr-dastandarmen de adam janyna áser etip, emdik sharalar jasaýǵa bolatyny aıdan anyq. Osy sebepti is-shara barysynda mýzeı qyzmetkeri Serik Shaıymhanov dombyrasynyń kúıin keltire Súıinbaı atasynyń birneshe termesin quıqyljyta oryndaǵan sátte tyńdap otyrǵan balalardyń erekshe kúıge bólengeni baıqaldy. Olardyń janarynan jalyn atyp, ónerge degen qushtarlyǵy arta túskendeı.
«Qamqorlyq» ortalyǵynyń ujymy mundaı sharalardyń jibin úzbeı jalǵasýyn surady. Bul, bir jaǵynan, elimizdiń ár qıyrynan keletin balalardyń mýzeı jumysymen tanysýyna yqpal etse, ekinshiden, kóńil kúılerin serpiltip, ońalýyna oń septigin tıgizedi», deıdi mýzeı qyzmetkeri Qarlyǵash Mýshırova.
Almaty oblysy