Premer-mınıstr Álıhan Smaıylov Shetel ınvestorlary keńesiniń aralyq otyrysyn ótkizdi. Onda Qazaqstandaǵy ınvestısııalyq ahýaldy odan ári jaqsartý boıynsha sharalar men usynystar talqylandy.
Premer-mınıstr Qazaqstan Úkimetiniń aldynda 2029 jylǵa qaraı ekonomıka kólemin 450 mlrd dollarǵa, ıaǵnı eki esege arttyrý boıynsha aýqymdy mindet turǵanyn atap ótti.
«Biz ESG prınsıpterin eskere otyryp, bul ýaqytta keminde 150 mlrd dollar shetel ınvestısııasyn tartýdy josparlap otyrmyz. Osy maqsattarǵa jetý úshin elimizdiń ınvestısııalyq ahýalyn odan ári jaqsartý baǵytynda júıeli sharalar qabyldanyp jatyr», dedi ol.
Á.Smaıylov atap ótkendeı, Shetel ınvestorlary keńesiniń kelesi plenarlyq otyrysy «Qazaqstandy jańa ındýstrııalandyrý» taqyrybyna arnalady.
«Memleket basshysy Qazaqstan halqyna Joldaýynda eldiń ónerkásiptik negizin qalyptastyrýdyń mańyzyn atap ótti. Úkimet jumysy ınvestısııalar kólemin ulǵaıtýǵa, ozyq tehnologııalardy transfertteýge, óndiristerdi lokalızasııalaýǵa jáne joǵary deńgeıde óńdelgen ónim shyǵaratyn klasterler qurýǵa baǵyttalǵan. О́ńdeý sektoryn jedel damytýǵa basymdyq beriledi», dedi Úkimet basshysy.
Onyń aıtýynsha, bul úshin qajetti zańnamalyq baza men ınstıtýsıonaldyq orta qalyptastyryldy. «О́nerkásiptik saıasat týraly» zań qabyldanyp, jańadan О́nerkásip jáne qurylys mınıstrligi quryldy.
«Úkimet ekonomıkanyń ósý serpinin saqtaý jáne eldegi ınvestısııalyq ahýaldy jaqsartý jóninde barlyq qajetti sharany qabyldaıdy. Biz sheteldik áriptesterimizdi Qazaqstandaǵy jobalarǵa ınvestısııa salýǵa shaqyramyz», dep atap ótti Á.Smaıylov.
Keńes barysynda Ernst&Young, TotalEnergies, Knauf, KPMG kompanııalarynyń ókilderi jáne elimiz ortalyq memlekettik organdarynyń basshylary sóz sóıledi.
Talqylaý qorytyndysy boıynsha Premer-mınıstr aıtylǵan barlyq usynys pen pikirdiń pysyqtalatynyn atap ótti. Sondaı-aq is-shara aıasynda Á.Smaıylov Shetel ınvestorlary keńesin jáne jalpy respýblıkanyń ınvestısııalyq ahýalyn damytýǵa qosqan úlesi úshin alǵyshattar tabys etti. Atap aıtqanda, Coca Cola Içecek Kazakhstan, Microsoft, Baker&McKenzie, Cameco Kazakhstan, Chevron Corporation, Deloitte, Exxon Mobil, Glencore, Marubeni kompanııalaryna berildi.
«Osy jyldary birlesken kúsh-jiger arqyly jańa óndiris oryndary iske qosyldy, iri jobalar júzege asyryldy, eń bastysy, myńdaǵan jumys orny ashyldy. Yntymaqtastyǵymyz ózara tıimdi bolyp, úlken perspektıvalarǵa jol ashyp, turaqty túrde damı beretinine senimdimin. Qazaqstan Úkimeti ınvestısııalyq baılanystardy tereńdetip, jańa birlesken jobalardy júzege asyrýǵa daıyn», dedi Premer-mınıstr.
Osy oraıda Shetel ınvestorlary keńesi Qazaqstan Prezıdentiniń janyndaǵy konsýltatıvtik-keńesshi organ ekenin aıta ketý kerek.