Mańǵystaýdaǵy Halyqaralyq teńiz saýda portynda jańa tankerlerdiń kelýine baılanysty saltanatty is-shara ótti. Jalpy kólemi 8 myń tonna munaı quıý tankerleri «QazMunaıGaz» UK» AQ men Abu Dhabi Ports Group (ADP) arasyndaǵy yntymaqtastyq sheńberinde satyp alyndy.
«Caspian Integrated Maritime Solutions Ltd» (CIMS) birlesken kásiporny, onyń aksıonerleri «Qazaqteńizkólikfloty» UTKQK» JShS (QMG enshiles kásiporny) jáne International Maritime Investments Ltd (ADP enshiles kompanııasy) ıeligindegi tankerler Nıderland konserniniń aýmaǵynda qurastyrylǵan. Kemelerdiń uzyndyǵy – 140 metr, eni – 16,7 metr, al shógindisi – 4,2 metr, jyldamdyǵy – 10 torap. Eki tanker de ozyq basqarý júıelerimen jabdyqtalǵan, olar barlyq halyqaralyq qaýipsizdik standartymen ekologııalyq talapqa sáıkes keledi.
Saltanatty is-sharaǵa Mańǵystaý oblysynyń ákimi N.Noǵaev, QMG basqarma tóraǵasy M.Myrzaǵalıev, Birikken Arab Ámirlikteriniń Qazaqstandaǵy Elshisi Muhammed Saıd Ál-Arıkı, ADP basqarma tóraǵasy Muhammed Juma Ál-Shamısı, «Qazaqteńizkólikfloty» UTKQK» JShS bas dırektory A.Orjanov, ózge de qonaqtar qatysty.
– Bul tankerlerdi satyp alý Memleket basshysy Qasym-Jomart Toqaevtyń otandyq kómirsýtek eksportynyń balamaly baǵyttaryn damytý jónindegi tapsyrmasyn oryndaý aıasynda júzege asyryldy. Biz árqashan óńirimizdi jan-jaqty damytýǵa baǵyttalǵan barlyq bastamany qoldaýǵa daıynbyz. «Qazaqteńizkólikfloty» Ulttyq tasymaldaýshysynda iske qosylatyn eki munaı tankeri elimizdiń ekonomıkasy men kólik-logıstıka salasynyń damýy men órkendeýine qyzmet etedi, – dedi aımaq basshysy Nurlan Noǵaev.
Is-sharada sóz sóılegen QMG basshysy jańa tankerlerdi satyp alý arqyly Transkaspıı baǵytyn damytýda mańyzdy qadam jasalǵanyn atap ótti.
–Tankerlerdiń biri BAÁ-degi Oazıs-Liwa degen mekenniń atymen, al ekinshi tanker tarıhı qala – Tarazdyń atymen atalǵan. Jańa tankerlerdi satyp alý arqyly biz Transkaspıı baǵytyn damytýda mańyzdy qadam jasap otyrmyz. Osyǵan baılanysty birlesken jobany sátti júzege asyrǵany úshin strategııalyq seriktesimizge shyn júrekten alǵysymdy bildirgim keledi, – dedi QMG basshysy Maǵzum Myrzaǵalıev.
Jańa kemeler bıyl jeltoqsan aıynda qoldanysqa beriledi. Alynǵan eki tanker elimizdiń jylyna 750 myń tonna munaı tasymaldaý jónindegi mindettemeni tolyǵymen oryndaýǵa múmkindik beredi.
Mańǵystaý oblysy