Premer-mınıstr Álıhan Smaıylovtyń tóraǵalyǵymen ótken Ekonomıkany demonopolızasııalaý jónindegi komıssııa otyrysynda taýarlyq gazdy tasymaldaý salasyndaǵy zańsyz ıemdenilgen aktıvterdi qaıtarý máselesi qaraldy, dep habarlaıdy Egemen.kz Úkimettiń baspasóz qyzmetine silteme jasap.
Bas prokýratýra júrgizgen tekserý nátıjesinde 2021 jyly jekemenshik kompanııa Atyraý oblysynda uzyndyǵy 200 metrden asatyn gaz qubyryn tómendetilgen baǵamen jáne zańdylyqty buza otyryp satyp alǵany anyqtalǵan. Naqty ataǵanda, «QazaqGaz» UK» AQ ulttyq operatorynyń gazben jabdyqtaý nysandaryn satyp alýǵa basym quqyǵy týraly zań normasy buzylǵan.
Talqylaý nátıjeleri boıynsha Komıssııa gaz qubyryn berý jónindegi mámileni jaramsyz dep taný jáne múlikti memleket menshigine qaıtarý boıynsha tıisti materıaldardy sotqa joldaý týraly sheshim qabyldady. Aldaǵy ýaqytta ony óńirdegi iri ónerkásiptik kásiporyndardy gazben qamtamasyz etý úshin paıdalaný josparlanyp otyr.
Premer-mınıstr osyǵan uqsas jaǵdaı qalyptasqan basqa da birqatar kásiporynda tıisti jumys júrgizý qajet ekenin atap ótti.