Petropavl ejelgi shahar bolsa da, turǵyndar sany 220 myń adamnyń tóńiregindegi shaǵyn oblys ortalyqtarynyń birine jatady. Soǵan qaramastan, esirtki taratý qylmysy qalada kóp taraǵan. Polısııanyń esebine súıensek, esirtki taratýmen aınalysqany úshin ustalǵandar sany artyp otyr.
Qalanyń ortalyq kósheleriniń birinde turatyn 38 jastaǵy adam ustalǵan kezde óziniń sıntetıkalyq esirtki taratýmen úsh aıdan beri aınalysyp kele jatqanyn moıyndaǵan. Ol aqysyn tólem kartasy arqyly alǵannan keıin tutynýshylaryna esirtkiniń jyltyr qaǵazǵa oralǵan dozasyn belgili jerlerge tyǵyp ketý arqyly taratqan. Ustalǵan adamdy tintkende 25 doza tabylǵan. Bul untaqtardyń psıhotroptyq zattar jáne mefedron ekeni anyqtaldy. Esirtkiniń jalpy salmaǵy 21 gramdaı. «Munsha esirtki 100 adamdy mas qylýǵa jetedi», deıdi Soltústik Qazaqstan oblysy PD Esirtkige qarsy kúres basqarmasynyń basshysy, polısııa podpolkovnıgi Rýslan Saparov.
Sıntetıkalyq esirtkilerdiń áseri adamnyń psıhıkasyn buzýǵa ósimdik tektesterden anaǵurlym qaterli. Qazir ony satý «qara bazardy» jaýlap alǵan.
Polısııa qyzmetkerleri esirtki tasymaldaýshylardy tabýǵa qyzmettik ıtterdiń kómegin de paıdalanady. Tasymaldaýshylar esirtki zattaryn neshe túrli qýlyqpen, tabylmaıtyndaı etip orap, tyqsa da, ıttiń ótkir ıisti sezý qabileti olardy báribir bultartpaıdy. Polısııa kapıtany Bolat Bekmaǵambetovtiń qaramaǵyndaǵy labrador tuqymdy Bella atty ıt jeke úıdi tintý barysynda polımerli paketterge jasyrylǵan ósimdik tektes zatty qýystardy ıiskelep júrip taýyp, qurylys qoqystary men eski temir peshtiń astynan tistelep alyp shyqqan. Saraptama bul zattyń salmaǵy 6 kg-dan asatyn marıhýana jáne salmaǵy 49 gr bolatyn gashısh ekenin anyqtady.
«Búgingi tańda bizde barlyǵy 50 qyzmettik-izdestirý ıti qylmysqa qarsy kúresýde kómek berip júr. Onyń 22-si kınologııalyq qyzmet ortalyǵynda, qalǵandary qalalyq basqarma men aýdandyq polısııa bólimderinde ustalady. Árqaısysy «jeke baǵdarlama» boıynsha úıretilgen. Bıylǵy 9 aıda qyzmettik-izdestirý ıtteri 281 qylmys, onyń ishinde 121 urlyqty ashýǵa kómektesti», deıdi polısııa maıory Samat Tólebaev.
О́tken aıda tártip saqshylary jaldamaly páterde 100 polımerlik paketke dozalardy bólip, salyp qoıǵan 25 jastaǵy jigitti ustady. Saraptama bul zattyń gashısh ekenin anyqtady. Tabylǵan «oljanyń» salmaǵy 2 kılodan asady. «Gashıshtiń asa úlken kólemi 200 gramnan bastalady. Al myna jaǵdaıda ustalýshyǵa sot 15 jylǵa deıin bas erkinen aıyrý jazasyn berýi múmkin», deıdi polısııa podpolkovnıgi R.Saparov.
Qarasha aıyna deıingi derekter boıynsha Soltústik Qazaqstan polıseıleri bıyl barlyǵy 730 kg esirtki túrlerin tárkiledi. Onyń ishinde 708 kılosy – marıhýana jáne keptirilmegen qarasora. Al gashıshtiń kólemi 20 kılodan asqan. Sıntetıkalyq psıhotropty zattardyń salmaǵy 2,2 kg bolǵan.
PETROPAVL