Shaıbaly hokkeıden Býdapeshttegi álem birinshiliginiń alǵashqy eki matchynda Majarstan men Danııany jeńgen Qazaqstannyń jastar quramasy bul joly da óz jankúıerlerin qýantty.
Eki týrdyń qorytyndysy boıynsha Fransııa men Qazaqstan upaıdan shashaý shyǵarmaı, jarys kestesiniń aldyńǵy leginde qatar kele jatty. Sársenbide bári de ózgerdi. Basynan aıaǵyna deıin alma-kezek shabýylymen ótken básekede fransýzdarǵa qaraǵanda bizdiń jigitter alymdy ári qarymdy kórindi. 10-mınýtta Dáýlet Núrkenov esep ashsa, oıyn bel ortadan aýǵanda Egor Smolıanınov ekinshi shaıbany qaqpaǵa toǵytty. Úshinshi kezeńde Nurkenov dýbl avtory atansa, Aleksandr Kım matchtyń sońǵy núktesin qoıdy. Esep – 4:0.
Osy jeńisten keıin upaı sanyn toǵyzǵa jetkizgen hokkeıshilerimiz jarys kestesinde jeke-dara kósh bastady. Keshe túnde jerlesterimiz Japonııamen kúsh synassa, 17 jeltoqsanda Aýstrııamen sheberlik baıqasady.