Osydan bes jyl buryn qurylǵan «Jas sarbaz» qozǵalysy balalar boıynda mektepten bastap ulttyq rýh uıalatady. Elimizdiń barlyq óńirinde jasaqtalǵan uıym oqýshylarǵa deneshynyqtyrýmen erkin aınalysýǵa múmkindik beredi. Eń bastysy, jastaıynan áskerı mamandyqtardy ıgerýine jol ashady. Bul uıym Qorǵanys mınıstrligimen birlesip, patrıottar tárbıeleý isine belsendi atsalysyp keledi. Búginde geografııasy keńeıip, quramy 280 myń tárbıelenýshige jetken.
«Jas sarbaz» balalar-jasóspirimder áskerı-patrıottyq qozǵalysynyń el úshin mańyzy zor. Jaqynda Qorǵanys mınıstriniń orynbasary, general-leıtenant Muhamedjan Talasovtyń basshylyǵymen arnaıy jıyn ótip, uıymnyń keler jyly iske asatyn negizgi jobalary tanystyryldy.
«Bes jyl ishinde «Jas sarbaz» qozǵalysy óz ustanymyn nyǵaıtyp, tujyrymdamalyq negizder men dástúrlerge ıe boldy. Búginde áskerı-patrıottyq qozǵalys elimizdiń barlyq óńirindegi 280 myńǵa jýyq balany qamtyp otyr. Qozǵalys tárbıelenýshileri otansúıgishtik rýhta tárbıelenip keledi», dedi general-leıtenant M.Talasov.
Odan keıin «Jas sarbaz» balalar-jasóspirimder qozǵalysynyń quryltaıshylar qatary tolyǵyp, olarǵa tósbelgiler men kýálikter tabys etildi. Qozǵalys aktıviniń keńeıtilgen jınalysynda qoǵamdyq birlestik belsendilerin, pedagogterdi, áskerı qyzmetshilerdi, azamattyq personal men jurtshylyq ókilderin saltanatty marapattaý rásimi ótti.
Jumalıevter jáne Mahmetovter otbasy arnaıy «Jas sarbaz alǵysy: ata-anaǵa» atalymyn qanjyǵasyna baılady. Al Roman Ogaı, Moldabaı Súıindikov jáne Vladımır Ilgnerdiń kópjyldyq pedagogtik eńbegi «Jas sarbaz alǵysy: ustazǵa» atalymymen atalyp ótti. Shyǵys Qazaqstan oblysyna qarasty Altaı qalasyndaǵy Saǵadat Nurmaǵambetov atyndaǵy №8 orta mektebiniń dırektory Ekaterına Pýtılına men Pavlodar qalasy Qabanbaı batyr atyndaǵy «Jas sarbaz» oblystyq mamandandyrylǵan mektep-ınternatynyń dırektory Iran Bektemirovke «Jas sarbaz alǵysy: tálimgerge» atalymy tabystaldy.
«Jas sarbaz» qozǵalysynyń is-sharalaryna belsendi qatysqan Túrkistan oblysynyń qorǵanys isteri jónindegi departamenti bastyǵynyń orynbasary, podpolkovnık Jandos Kúlderbaev pen Talǵat Bıgeldınov atyndaǵy «Jas ulan» respýblıkalyq mektebi bastyǵynyń orynbasary, maıor Arman Qaldybekov «Jas sarbaz alǵysy: tárbıeshige» syılyǵyn ıelendi. Áleýmettik jeliler men BAQ-ta taratylatyn taqyryptyq beınerolıkter men fılmderdi jasaýda kómek kórsetken Qorǵanys mınıstrligi Medıa-kontent ortalyǵy Montajdaý jáne dızaın basqarmasynyń bastyǵy Sánııa Sadyqova «Jas sarbaz alǵysy: janashyrǵa» atalymynda jeńimpaz bolyp tanyldy.
Jıyn barysynda Jetisý oblysynyń áskerı patrıottyq tárbıe jumystary joǵary baǵalanyp, atalǵan uıymnyń óńirlik fılıalynyń tóraǵasy Aıbol Qasenov, alǵashqy áskerı daıyndyq ustazdary Jandos Qanapıev, Fedor Goncharov, Dastan Dúısembekov «Jas sarbaz» qozǵalysynyń mereıtoılyq tósbelgisimen marapattaldy.
Qazir Jetisýda Otan aldynda boryshyn óteýge asyqqan jigerli jastar kóp. Oǵan atalǵan uıymnyń qosqan úlesi zor. Oblysqa jumys saparymen kelgen Qarýly Kúshter Bas shtaby Uıymdastyrý-jumyldyrý jumystary Departamentiniń bastyǵy, general-maıor Baýyrjan Artyqov Úshtóbe qalasyndaǵy jınaqtaý pýnktiniń qurylys nysanyn aralap kórdi. Sodan soń oblystyq Qorǵanys isteri jónindegi departamenti, oblystyq jınaqtaý pýnkti, Taldyqorǵan qalasynyń Qorǵanys isteri jónindegi basqarmasy, Sarqan, Aqsý, Eskeldi jáne Kerbulaq aýdany Qorǵanys isteri jónindegi bólimderimen tanysty. Qalalyq qorǵanys isteri jónindegi bólimniń bastyǵy, podpolkovnık Vladımır Kım atqarylyp jatqan jumystar barysyn baıandady.
Sondaı-aq B.Artyqov aýdan, qala ákimderimen qatar jastarmen tildesti. Onda áskerge shaqyrylǵan jastar men jınaqtaý pýnktteriniń máseleleri kóterilip, bolashaq sarbazdarmen jan-jaqty áńgime órbidi.
«Áskerge barý – árbir er-azamat úshin paryz. Bul – Otan aldyndaǵy qaryzyń, úlken abyroı jáne mártebe. Qaı kezde bolsyn, otbasyńdy, týǵan jerińdi qorǵaýǵa saqadaı saı bolýyń kerek. Sondyqtan sizder úshin aldaǵy birjyldyq ýaqyt – ómirlik sabaq alatyn, naǵyz azamat bolyp shyńdalyp shyǵatyn mańyzdy kezeń bolmaq», dedi general-maıor.
Kezdesý sońynda departament, basqarma jáne bólim basshylaryna tıisti tapsyrmalar berdi.
Jetisý oblysy