Mádenıt jáne aqparat mınıstrligi Qoljazbalar jáne sırek kitaptar ulttyq ortalyǵy men ál-Farabı atyndaǵy Qazaq ulttyq ýnıversıtetiniń «Jazba jádigerler jáne rýhanı mura» ǵylymı zertteý mekemesiniń uıymdastyrýmen «Úndistan eliniń qorlaryndaǵy Qazaqstan tarıhyna qatysty kóne qoljazbalar men arhıvtik derekter» atty ǵylymı semınar ótti.
Semınarda «Arhıv-2025» jobasy aıasynda Qoljazbalar jáne sırek kitaptar ulttyq ortalyǵynyń mamandary Úndistannan elge jetkizgen tarıhı qoljazbalar men qujattardy ǵylymı aınalymǵa engizý, Úndistan qorlaryndaǵy áli de anyqtalmaǵan Qazaqstan jáne Ortalyq Azııaǵa qatysty mańyzdy tarıhı qujattardy jınaý jáne zertteý máseleleri talqylandy. «Arhıv-2025» memlekettik jobasy dúnıejúzi qazaqtarynyń tarıhyna qatysty barlyq derekti jınaýǵa jańa múmkindikter ashyp otyr. О́tken jyly Ortalyqtyń mamandary, ǵalymdar elimizdiń tarıhyna qatysty kóptegen qundy qujattyń kóshirmesin taýyp, elge jetkizdi. Úndistan arhıvinde qazaq tarıhyna qatysty muralar óte kóp jınaqtalǵan. Aldaǵy ýaqytta da jumystar jalǵasatynyna senimdimin», dedi Qoljazbalar jáne sırek kitaptar ulttyq ortalyǵynyń dırektory Jandos Boldyqov.
Semınar barysynda Qazaqstandaǵy Úndistan elshiligi janyndaǵy Svamı Vıvekananda mádenı ortalyǵynyń dırektory Sandjaı Vedı úndi eliniń Patna kitaphanasy qorynan tabylǵan parsy tilindegi «Tarıh-ı-Abýl haır han» jáne «History of Mongols» kitaptarynyń kóshirmesin tapsyrdy. «Ata-babalarymyz ortaǵasyrlardan beri mádenı baılanysyn úzgen joq. Únemi bir-birimen tyǵyz qarym-qatynasta bolǵanyn qazirgi Úndistannyń arhıv, kitaphana qorlarynan tabylyp jatqan tarıhı qujattar aıqyndaıdy. Búgin Qazaqstannyń Qoljazbalar jáne sırek kitaptar ulttyq ortalyǵyna eki kitaptyń kóshirmesin tapsyrdyq. Qazaqstannyń zertteýshi ǵalymdary kitaptardy aýdaryp, zertteý júrgizse kóptegen qundy málimet taba alady dep senemin», dedi Sandjaı Vedı.
Sonymen qatar Ál-Farabı atyndaǵy QazUÝ «Jazba jádiger jáne rýhanı mura» ǵylymı zertteý ortalyǵynyń qyzmetkeri, PhD О́mir Orazuly dala elıtalaryna arnaıy jazylǵan ortaǵasyrlyq túrki medısınalyq traktattarynyń kóshirmesin tapsyrdy. Olardyń qatarynda Kóshim hannyń jeke dárigeri bolǵan Sultān Álӣ ál-Hýrasanӣdiń «Dastӯr al-‘ılāj» («Emshilik dástúri») atty traktaty men shaıbanılerdiń hany Abdallatıftiń jeke dárigeri Mýlla Mýhammad Iýsýftyń «Zýbdat al-kahhalın» («Kóz dárigerleriniń qaımaǵy») eńbegi bar. Ǵalym qazaq tarıhyna, onyń ishinde halyqtyq medısına salasyna qatysty qundy traktattar Úndistan qorynan anyqtalyp, zerttelgenin málimdedi.
Semınar aıasynda 2022 jyly Úndistannan elge jetkizilgen qujattardyń «Úndistan ulttyq arhıvindegi qazaq kóshine qatysty qujattar» kórmesi tanystyryldy.