О́render jarysy

Osy básekeler barysynda BAQ ókilderine suhbat bergen atalǵan jarystyń basty demeýshisi «Halyq» qorynyń Almaty oblysy boıynsha fılıalynyń dırektory Ǵalymbek Jaqsylyq: «Jastarymyzdy bala kezinen durys tárbıelep, olarǵa oń baǵyt-baǵdar berý óte mańyzdy. Sony qaperge ala otyryp, biz jetkinshekterdi sport pen salamatty ómir saltyna baýlýǵa baǵyttalǵan osy ıgi is-sharany qolǵa aldyq. Mine, búgin karateshilerimiz Alataý baýraıynda bas qosyp, dúıim jurttyń aldynda óz sheberlikterin kórsetýde. Tamyryn tereńge tartqan karateniń ózindik fılosofııasy men qaǵıdattary bar. Eń bastysy, ol adamdy izgilikke, tártipke, jaýapkershilikke úıretedi. Osyndaı baǵa jetpes qundylyqtardy árqaısysymyz óz balalarymyzdyń boıyna sińirýimiz qajet. «Halyq» qory osy sharamen ǵana shektelip qalǵan joq. Máselen, bıyl «Aýyl fýtboly» degen jobanyń bas demeýshisi boldyq. Sol arqyly shal­ǵaıdaǵy eldi mekenderde tynbaı eńbek etip jatqan 100 balalar jattyqtyrýshysyn ÝEFA-nyń talaptaryna saı D kategorııasy boıynsha oqytyp jatyrmyz. Sonymen qatar aýyldyń 100 komandasyn qajetti qural-jabdyqtarmen qamtamasyz ettik», dep biraz tartymdy áńgimeniń tıegin aǵytty.

«Qazaqstannyń barlyq stıldegi karate federa­sııasy» respýblıkalyq qoǵamdyq birlestigi uıym­dastyrǵan jarysqa keler bolsaq, balǵyn sportshylar men jas órender arasynda aıryq­sha sheberligimen kózge túskender az bolǵan joq. Solardyń arasynan Iаsmına Iаsınjanova, Alýa Azathan, Nurtilek Eljanov, Dıas Nurlan, Shapaǵat Qýandyq, Ámihan Erkin, Syrym Asqar, Balaýsa Qýandyq, Aıajan Myr­zahmet jáne Jangúl Myrzasadyq syndy karate­shilerdi erekshe atap ótýge bolady. Olardyń barlyǵy da bas júldeni oljalady. Sondaı-aq shetelden kelgen jas jetkinshekterdiń de birazy ózderin jaqsy qyrynan kórsetip, jeńis tuǵyryna kóterildi.

«bel-bilek» halyqaralyq shyǵys jekpe-jegi fes­tıvali aıaqtalǵannan keıin jeńimpazdar men júl­de­gerler túrli-tústi medaldy moınynda jarqy­ratsa, osy sport túrin damytýǵa eleýli úles qosqan 50 jattyq­tyrý­shyǵa alǵyshat pen estelik syılyq tabys etildi.