«Bolshaıa operanyń» jeńimpazy

– Dinmuhamed Kóshkinbaev – taza verdılik daýysqa ıe daryndy oryndaýshy. Onyń jobada ózin tolyqtaı erkin ustaýy meni tánti etti, – dep pikirimen bólisti «Bolshaıa opera» telejobasy qazylar alqasynyń múshesi, álemdik opera juldyzy, vokal ustazy Marına Mesherıakova.

– Sahnada eshteńeden qymsynbaı óner kórsetý kerek. Bastapqyda ol maǵan qarapaıym, uıalshaq adam sekildi kórindi, alaıda ol «Bolshaıa opera» jobasynda ózin tolyǵymen ashty. Sahnada somdaǵan árbir beınesinde ózin erkin ustap, shynaıy óner kór­setti.

Dinmuhamed Kóshkinbaev – astana opera Halyqaralyq opera akademııasynyń túlegi, Bıbigúl Tólegenova baıqaýynyń bas júldegeri, Eva Marton ta­nymal halyqaralyq vokalıs­ter baıqaýynyń (Majarstan) fı­­nalısi. Qarashada ánshiniń qorjynynda taǵy bir bedeldi marapat paıda boldy – oryndaýshy úshinshi oryn ıelenip, Opera Crown Tbilisi halyqaralyq vokalıster baıqaýynyń arnaıy júldesin aldy.

– «Bolshaıa opera» joba­syndaǵy jeńis – men úshin úl­ken oqıǵa, shyǵarmashylyq man­sabymdaǵy mańyzdy kezeń ári zor tájirıbe. Shynymdy aıtaıyn, oǵan qol jetkizý ońaı bolǵan joq. Árbir shyǵarylymǵa jeke spektaklde óner kórsetetindeı da­ıyn­dalý qajet boldy, beınege ený jáne oryndaý eń joǵary deńgeıde bolýǵa tıis edi. Men ózim sheksiz qurmetteıtin jáne tamsanatyn qazylar alqasynyń aldynda ǵana emes, sonymen qatar úlken televızııalyq aýdıtorııanyń aldynda óner kórsetetinimdi jete túsindim. Sondaı-aq meniń óner kórsetýime qarap, kórermenderdiń bizdiń elimizdegi vokaldyq óner deńgeıin baǵalaıtynyn da bildim, – dep atap ótti Dinmuhamed Kósh­kinbaev.

Bıyl «Bolshaıa opera» jobasyna qatysýǵa 300-ge jýyq úmitker ótinim joldaǵan, al qazylar al­qasynyń quramyna A.Pýshkın atyndaǵy Nıjegorodsk opera jáne balet teatry opera trýp­pasynyń jetekshisi Medeıa Iаso­nıdı, opera ánshisi Marına Me­sherıakova, dırıjer Marko Boemı, «Gelıkon-Operanyń» kórkemdik je­tekshisi Dmıtrıı Bertman endi.