Memleket basshysy Qasym-Jomart Toqaev el gazeti «Egemen Qazaqstan» gazetine bergen keń kólemdi suhbatynda Qańtar oqıǵasy kezinde jergilikti bılik pen UQShU atqarǵan jumystardy saralap berdi, dep jazady Egemen.kz.
Qańtar oqıǵasy bolǵaly týra 2 jyl ýaqyt ótti. Osy tusta memeleket basshysy ǵalym, «Qazaq gazetteri» JShS Bas dırektory Dıhan Qamzabekulyna bergen «Biz ozyq oıly ult retinde tek qana alǵa qaraýymyz kerek» atty suhbatynda sol bir almaǵaıyp shaqta UQShU-dan kómek suraý qanshalyqty durys bolǵanyn, osy árekettiń kórshi Reseı elinde Qazaqstandy orys halqy qutqaryp qaldy dep aıtylyp júrgen pikirge jaýap berdi.
«Aımaqtarda jappaı tártipsizdik beleń alyp, jergilikti bılik dármensizdik tanytqanda, Qaýipsizdik keńesi Ujymdyq qaýipsizdik týraly shart uıymyna júginý týraly sheshim qabyldady. Qazaqstan onyń bitimgerlik kúshterin turaqtylyq pen qaýipsizdikti qamtamasyz etý úshin ǵana qysqa merzimge engizýdi surady. Bul jerde myna jaıtqa basa mán berý kerek. Biz bul qurylymnyń múshesi retinde Reseıge emes, Ujymdyq qaýipsizdik týraly shart uıymyna júgindik.
Sol kezde osy uıymnyń tóraǵasy Armenııa edi. Bıyl UQShU-ǵa Qazaqstan tóraǵalyq etedi. Qurylym jasaǵy, shyn máninde, bitimgerlik ról atqaryp, qasiretti kúnderde eldi jaılaǵan júgensizdikti toqtatýǵa septigin tıgizdi. Uıymǵa múshe-memlekettermen kelisilgendeı, bul bitimgerlik kúshter aldyn ala eshqandaı talap qoımastan, onyń ústine merziminen buryn Qazaqstannan syrtqa shyǵaryldy», dedi Qasym-Jomart Toqaev.
Memleket basshysy osy saýalǵa jaýap bere kele UQShU uıymy lańkesterge qarsy operasııa qatyspaǵanyn, qaqtyǵys kezinde birde-bir oq atpaǵanyn basa aıtty.
«UQShU bitimgerlik kúshteri lańkestikke qarsy operasııalarǵa qatysqan joq, birde-bir oq atqan joq. Armenııa jasaǵy «Aqsaı» nan zaýytyn jáne «Almaty sý» mekemesin, Belarýs jasaǵy Jetigendegi aerodromdy, Tájikstan men Qyrǵyz Respýblıkasynyń áskerı qyzmetshileri Almaty qalasynyń birinshi jáne ekinshi jylý elektr ortalyqtaryn, Reseı jasaǵy úshinshi jylý elektr ortalyǵy men telekommýnıkasııa nysandaryn kúzetti. Osy mańyzdy nysandarǵa lańkestik shabýyldar jasalýy múmkin degen qaýip boldy. Sondyqtan bitimgerlik kúshter solardy kúzetýge jiberildi. Eń bastysy, sol arqyly óz kúshterimizdi lańkestikke qarsy operasııaǵa jumyldyrýǵa múmkindik týdy», dedi Prezıdent.