Balyq sharýashylyǵy – Mańǵystaýda keń qanat jaımasa da, ózindik tynys-tirligi bar sala. О́ńirdegi 169 balyq brıgadasynda 811 balyqshy bar. Balyq aýlaýǵa arnalǵan 33 aımaq Túpqaraǵan men Qaraqııa aýdandarynda ornalasqan. Balyq sharýashylyǵynda túıtkildi másele de bar. Sol sebepti óńirdegi balyqshylar máseleleri, saladaǵy kadr tapshylyǵy óńirlik kásipkerler palatasynda arnaıy uıymdastyrylǵan semınarda talqylandy.
Amangeldi Beksarıev balyq sharýashylyǵymen jastaıynan aınalysady. Ol tórt aı buryn Atyraýdan bekire tuqymdas balyqtardyń shabaqtaryn arnaıy alyp kelip, Mańǵystaýda ósirýdi kózdegen eken.
– Qaraqııa aýdanynyń Quryq aýyly mańyndaǵy Sarsha jerinde balyq sharýashylyǵyn bastap jatqan jaıym bar. Tushy sýda tirshilik etken balyqtardyń Kaspıı teńiziniń sýyna beıimdelýin baǵamdaý úshin 100 danasyn ákeldim. Osy baǵytta isimdi jalǵastyrýǵa nıettimin – dedi ol.
Sondaı-aq basqosýda balyq sharýashylyǵy salasyn jetik meńgergen bilikti mamandardyń azdyǵy sóz boldy. Bilim men aqparattyń jetimsizdiginen óńirdegi 800-den astam balyqshy memleketten beriletin sýbsıdııaǵa qol jetkize almady. Sondyqtan 30 jyldyq tájirıbesi bar balyqshy A.Nımatov áriptesterin úsh kún oqytýǵa keldi.
– Granttar balyq sharýashylyǵy mamandyqtaryna bólinip jatqanymen, balyqshy mamandyǵyna suranys az. Sol sebepti, kóp grant keri qaıtaryldy. Biz semınarlar, kýrstar uıymdastyryp, ınstıtýttardyń janynan qysqa kýrstar ashyp, maman daıarlaýymyz kerek. Kadrsyz balyq sharýashylyǵy damymaıdy, – dep atap ótti A.Nımatov.
Mańǵystaýda Kaspıı teńizinen 100 myń tonna balyq aýlaý josparlandy.
Mańǵystaý oblysy kásipkerler palatasynyń dırektory Rashıt Mustapaevtyń aıtýynsha, 2021-2030 jyldarǵa arnalǵan balyq ósirýge arnalǵan Úkimet qaýlysy negizinde aýqymdy sharalar qolǵa alynyp otyr. Balyqshylarǵa sharýashylyqtyń qyr-syry úıretiledi. Palatadaǵylardyń aıtýynsha, balyq úsh jylda ýyldyryq bere bastaıdy desek, balyq kásipshiliginen de mol qarjy taýyp, shyǵyndy óteýge bolady.
Mańǵystaý oblysy