Astananyń №3 kópbeıindi qalalyq aýrýhanasynda 5 484 gr salmaqpen batyr sábı dúnıege keldi, dep habarlaıdy Egemen.kz elorda ákimdiginiń resmı saıtyna silteme jasap.
Aıta keterligi, dárigerler kesar tiligine júginbedi, kelinshek ózdiginen tabıǵı jolmen bosandy.
Sábıdiń 35 jastaǵy anasy bul onyń úshinshi balasy ekenin aıtty.
О́zge balalary da 4500 jáne 4050 gr salmaqta dúnıege kelgen.
Ol aýrýhana qyzmetkerlerine kásibıligi men qamqorlyǵy úshin rızashylyǵyn bildirdi. Ásirese akýsheri Zalına Asanovaǵa alǵysy erekshe.
«Asqynýsyz bosandy, biraq, árıne, erekshe nazar aýdarýǵa turarlyq. Ishtegi náresteniń úlkendigine qaramastan, bári jaqsy ótti. Eń bastysy – balanyń deni saý jáne ana baqytty. Bul bizdiń jumysymyzdyń basty maqsaty», dep pikir bildirdi akýsher.
Áıelderdi bosandyrý bóliminiń meńgerýshisi Gúlnár Qaıyrbekova salmaǵy bes keliden asatyn balalar óte sırek dúnıege keletinin atap ótti.
«Perzenthanamyzdy sońǵy aıda ekinshi osyndaı alyp bala dúnıe esigin ashty. Jeltoqsan aıynda salmaǵy 5 kg-dan asatyn sábı dúnıege kelgen», dedi ol.