El jastarynyń basym bóligi shoǵyrlanǵan megapolıste jastardy qoldaýǵa arnalǵan aýqymdy jobalar az emes. Bıyldan bastap qalanyń ár aýdanynda osy sanattaǵy azamattardy qoldaýǵa arnalǵan komıýnıtı ortalyqtar jumys isteı bastaıdy. Kúni keshe sonyń alǵashqysy Áýezov aýdanynda esik ashty.
Atalǵan aýdanda 14 pen 35 jasqa deıingi 102 myń azamat turady desek, onyń 7,8 paıyzy NEET sanatyndaǵy jastar. Jastardyń shyǵarmashylyq bastamalaryn damytýǵa arnalǵan ortalyqtyń ashylý saltanatyna qatysqan qala ákimi Erbolat Dosaev, keler jylǵa deıin shaharda osyndaı 16 ortalyq jumysyn bastaıtynyn jetkizdi.
El aýmaǵynda alǵash qanat qaqqan jobany júzege asyrý úshin ákimdik byltyrdan bastap iske kirisken. Birneshe ǵımarat satyp alynyp, jóndeý jumystary júrgizildi. Taıaýda jylyna 800 myń jasqa qyzmet kórsetýge qaýqarly taǵy 7 birdeı ortalyq ashylyp, jastar úshin ıdeıa almasý alańyna aınalmaq. Munda tegin negizde bilim berý men mádenı is-sharalar ótkizilip, jastar bilikti psıhologter men zańgerlerdiń kómegin, sondaı-aq jumysqa ornalasý men qarjy máselesi boıynsha mamandardan keńes ala alady.
«Almaty – jastar qalasy. Bizde 14 pen 35 jas aralyǵyndaǵy 680 myńnan astam jas bar. Biraq bas qosyp oı bólisetin, qıyn kezde kómek kórsetetin ortalyq qalada bolǵan emes. Qazir biz bul máseleni tıimdi sheship jatyrmyz. Jyl sońyna deıin bazalyq ınfraqurylym qurýǵa tyrysamyz. Bizge jastardan keri baılanys qajet. Olar úshin aqysyz negizde bilim berý kýrsy men biliktilikti arttyrý kýrstaryn ótkizýge, jastar baǵdarlamasyn qazirgi zamanǵa beıimdeýge árkez daıynbyz. Memleket basshysy óz suhbatynda atap ótkendeı, jastarǵa birinshi kezekte kóńil bólinedi», deıdi Erbolat Dosaev.
Komıýnıtı ortalyqtarynyń rezıdentteri úshin barlyq qyzmet tegin. Buǵan qosa kólikke, qoǵamdyq tamaqtanýǵa, sporttyq jáne mádenı ınfraqurylymdy paıdalanýǵa, oqytý men sheberlik dáristerine jeńildikter beretin keshendi dıskonttyq kartalar iske qosylǵan.
«Jumyssyzdar kommýnaldyq ortalyqtan memlekettik baǵdarlamalar boıynsha keńes ala alady, sonymen qatar jumysqa ornalasý men oqýǵa qatysty aqparattardy bile alady. Ol úshin «Jasalmaty.kz» portalyna tirkelip, «JobFair365» jumysqa ornalastyrý platformasynda túıindeme jazýy kerek. Bul rette, kózdegen bos jumys orny boıynsha qajetti daǵdysy bolmasa, jastar «SkillBridge» platformasynda ózekti mamandyqtar boıynsha qysqamerzimdi oqytýdan óte alady», deıdi Almaty qalasy jastar saıasaty basqarmasynyń basshysy Qaıyrjan Meńdiǵalıev.
Jastarǵa qoldaý kórsetetin mundaı alańdar qurý – álemdik tájirıbede jemisin kórsetken joba. Komıýnıtı ortalyqtar eńbek naryǵy úshin suranysqa ıe mamandardy daıarlaýǵa jáne jastardy megapolıstiń qoǵamdyq bastamalaryna tartýǵa múmkindik bermek.
Sý jańa ortalyqtyń dızaın jobasyn jasaǵan Krıstına Bekmyrzaeva: «Ortalyqtyń dızaıny – árbir jastyń áleýetin ashýdyń kilti. Biz qabyrǵa men shatyrdy ǵana emes, shyǵarmashylyqtyń, ıdeıa almasýdyń jáne tulǵalyq damýdyń áleýetti alańyn qurýdy maqsat ettik. Jastar úshin barynsha qolaıly jaǵdaı jasaýǵa tyrysamyz, ǵımarattaǵy árbir detal rýhanı damýǵa, shyǵarmashylyq óristeýge áser syılaý úshin barymyzdy saldyq», dep atap ótti.
ALMATY