Qys kólik júrgizýshileri úshin ońaı eńseretin kezeń emes. Mezgildegi aýa raıy erekshelikteri olardy biraz sarsańǵa salyp júrgeni belgili. Osy ýaqytta kólik kútimine qatysty suraq kóp. Avtokólik tizgindegenderdiń pikirin qaq bóletin jaıttyń biri - qysta kólikti qyzdyrý-qyzdyrmaý máselesi. Alǵashqy top kólikti mindetti túrde qyzdyrýdy qajet dep tapsa, kelesi top bul proseske ketken mınýttardy bos ýaqyt ótkizýge teńeıdi. Al kólik ekspertteri eki qaǵıdanyń altyn aralyǵyn ustanǵan jón degen pikirdi alǵa tartady, dep jazady Egemen.kz.
Qystyń kúni qaz qatar tizilgen kólikterdi aýlada qyzdyryp turǵan júrgizýshilerdi jıi baıqaımyz. Asylynda aýlada toqtap turǵan kólikti qyzdyrý zań aıasynda qalaı retteledi?
QR «Jol júrisi» týraly Zańnyń 17 bóligi, 2-tarmaǵynda toqtap turǵan kólikti turǵyn úı aýlalarynda qyzdyrýǵa tyıym salynsa, 12-tarmaǵynda: «bul turǵyndarǵa qolaısyzdyq týdyratyn bolsa, eldi mekenderde qozǵaltqyshty qosyp qoıyp turaqtaýǵa tyıym salynǵan», dep jazylǵan. Alaıda júrgizýshiler men patrýldik polısııa bul erejeni eskere bermeıdi.
Ereje boıynsha kólik belgili bir sebepterge baılanysty 5 mınýttan asa qozǵaltqyshy qosýly kúıde aıaldasa, osy ýaqyt sheginen assa onyń turaqta turǵanyn bildiredi. Eger siz kóligińizdi otaldyryp, ol qyzǵansha úıge kirip ketseńiz bul erejeni buzý bolyp sanalady.
Al kólikti qyzdyrý qajet pe degen tartysqa toqtalsaq, mamandar dızel otyndy paıdalanatyn kólikti mindetti túrde qyzdyrý qajet dep esepteıdi. Al qyzdyrý ýaqytyn syrttaǵy aýa temperatýrasyna qaraı baǵamdaý kerek.
+5 - 0 gradýs arasyndaǵy aýa temperatýrasy kezinde kólikti 1 mınýt qyzdyrý jetkilikti.
Al kún raıy 0, - 10 gradýs bolsa qozǵaltqyshtyń qyzýyna 2 mınýt bólgen durys.
-10, - 20 gradýs aıazda avtokólikti 5 mınýt shamasynda qyzdyrý usynylady.
Aýa temperatýrasy - 20 gradýstan joǵary bolsa kólikti 7-10 mınýtqa deıin qyzdyrý qajet.
Alǵashqy toptyń pikirinshe kólikti qyzdyrý onyń uzaq ári senimdi qyzmet etýine, tok sırkýlıasııasynyń qalypqa kelýine septesip, qaýipsiz qımyldaýǵa senim artady degen ustanymda.
Al kóliktiń qyzǵanyn kútýdiń qajeti joq dep sanaıtyn top kún saıyn tizginge otyryp, kólikti qozǵaltqanda alǵashynda jyldamdyqty asyrmaı aıdap, baǵdarshamǵa toqtaǵanda, kepteliste turǵanda-aq mashına qyzady dep esepteıdi. Bul toptyń pikirinshe qozǵaltqysh qalypty temperatýraǵa túskende ǵana jyldamdyqty qosýǵa bolady.
Ekologtar kólikti qyzdyrý prosesi aýa sapasynyń aıtarlyqtaı nasharlaýyna ákelip soǵatynyn aıtyp dabyl qaǵady. Osy qaǵıda negizinde Germanııa, AQSh-tyń 31 shtatynda t.b. memleketterde kólikti qyzdyrýǵa tyıym salynǵan. Alaıda alyp AQSh-tyń aımaqtaryndaǵy klımattyq erekshelikter negizinde qaǵıda qubylyp tur.
Al aıazda otalmaı qalǵan kólikti iske qosýdyń shyǵynsyz ári eń ońaı nusqalaryn myna siltemege ótip bile alasyzdar.