Kaspi.kz fınteh-holdıngi AQSh-taǵy NASDAQ bırjasynda aksııalaryn bastapqy jarııa ornalastyrýǵa (IPO) shyǵardy. London qor bırjasynyń saıtyndaǵy aqparat boıynsha, Kaspi.kz árqaısysy kompanııanyń ádettegi bir aksııasyn usynatyn 11 300 000 amerıkalyq depozıtarlyq aksııany (ADS) ornalastyrǵan. Ornalastyrý baǵasy – ADS úshin 92 dollardan.
NASDAQ bırjasynda ADS «KSPI» belgisimen saýdalana bastaǵan. Kaspi.kz-tiń IPO-ǵa tartqan qarjy kólemi 1 mlrd 039 mln dollardy quraıdy. Ornalastyrýdyń jetekshi býkrannerleri (ótinimdi qabyldaýmen aınalysatyn kompanııa) – Morgan Stanley, J.P. Morgan jáne Citigroup. Al Susquehanna Financial Group, LLLP and Wolfe | Nomura Alliance baǵaly qaǵazdardy ornalastyrý boıynsha qosymsha menedjerler retinde jumys isteıdi. Jalpy, fınteh-holdıng IPO aıasynda 9 mln amerıkalyq depozıtarlyq aksııasyn ornalastyrýdy josparlaıdy.
«Nıý-Iorktaǵy Time Square-de Qazaqstannyń úlken týyn kórgen kezimizdegi keýdemizdi kernegen maqtanysh sezimin sózben aıtyp jetkizý qıyn. Biz sizdermen birlesip, Qazaqstandy jańa deńgeıge shyǵardyq, elimizdi jahandyq ınnovasııalyq kartaǵa engizdik, sonymen qatar álem boıynsha kóptegen kompanııa men ınvestor úshin úlgi boldyq. Kaspi.kz damýynyń jańa kezeńine aıaq basyp otyrmyz. Endi árqaısysyńyzdyń aldyńyzdaǵy jaýapkershiligimiz odan ári ulǵaıa tústi. Súıikti klıentterimiz ben seriktesterimizge aıtar alǵysymyz zor. Jańa jetistikterge jetýge bizdi yntalandyra berińizder. Biz sizderdiń ómirlerińizdi jaqsartatyn jáne eldiń damýyna eleýli úles qosatyn ınnovasııalyq servıs qurýdy jalǵastyra beremiz», deıdi Kaspi.kz basshysy Mıhaıl Lomtadze.
NASDAQ jahandyq ornalastyrý jónindegi jetekshisi Keren Snoýdyń aıtýynsha, Kaspi.kz 17 jyl buryn Almatyda qurylǵaly beri halyqtyń ómirin jaqsartýdy óziniń mıssııasyna aınaldyryp, sıfrlandyrýǵa orasan zor úles qosty. Kaspi.kz sýperqosymshasy elektrondy kommersııa, saıahat, azyq-túlik, tólemder, QR-kodpen tóleý jáne memlekettik qyzmetterdi usynyp, Qazaqstan azamattarynyń kúndelikti ómiriniń bir bóligine aınaldy jáne álemdegi basqa qosymshalarmen salystyrǵanda qoldaný boıynsha eń joǵary kórsetkishterge ıe.
Aıta keteıik, Kaspi.kz 2020 jyldyń qazan aıynda London qor bırjasynda (LSE) IPO ótkizdi. Ol kezde kompanııa aksıonerleri IPO-ǵa kompanııa aksııasynyń 15 paıyzyn ornalastyryp, 1 mlrd dollar tartqan bolatyn.