Keshe Qalıbek Qýanyshbaev atyndaǵy memlekettik akademııalyq qazaq mýzykalyq drama teatrynda kórnekti memleket qaıratkeri, aqyn, jazýshy, dramatýrg, kompozıtor Sáken Seıfýllınniń týǵanyna 130 jyl tolýyna oraı Qanat Júnisovtiń «Sáken-suńqar» spektakliniń arnaıy kórsetilimi boldy. Spektakldiń qoıýshy rejısseri – Qazaqstannyń eńbek sińirgen qaıratkeri Álimbek Orazbekov.
Qazaq eliniń mańdaıyna bitken qaıratker, aqyn, jazýshy, dramatýrg, ustaz Sáken Seıfýllınniń ǵumyrynan syr shertetin týyndy kórermen nazaryna 2014 jyldan bastap usynylyp keledi. Taǵdyry tar jol, taıǵaq keshýge toly ult qaıratkeri eliniń keleshegi jarqyn bolýy úshin kúresti. Biraq kúrdeli ıdeologııalyq maıdanda qyzý tartysqa túsip, ózi qurǵan ókimettiń qurbany boldy. Rejısser Álimbek Orazbekov sahnalaǵan qoıylym el qurmetine ıe bolǵan syrbaz Sákenniń ǵumyr jolynan, ǵıbratty ómirinen syr shertedi.
«El úshin jan qıǵan esil erlerdiń árqaısysy zor qurmetke laıyq. Solardyń biri – memleket jáne qoǵam qaıratkeri aqıyq aqyn, jazýshy-dramatýrg S.Seıfýllın. Qanat Júnisov jazyp, Álimbek Orazbekov qoıǵan spektaklde suńqar Sákenniń ómirimen qatar, zamany da qamtylypty. Ásirese Alash kósemderiniń biri Ahmet Baıtursynulymen arasyndaǵy syılastyǵy, pikirtalasy aıqyn berilgen. Tulǵalar arasyndaǵy dıalogter tarıhı derektermen órbı otyryp kórkemdik sheshimderge ulasady. Ult taǵdyry synǵa túsken ýaqyttaǵy ulylarymyzdyń qaıtsek qazaqty muratqa jetkizemiz dep jantalasqan tustary kórermendi birden baýrap áketti. Avtor S.Seıfýllındi bas keıipker deńgeıinde jazǵanmen, Ahańnyń beınesin esh alasartpaǵan. Bas keıipkerden bıik bolmasa tómen emes. Sákenniń Ahańa degen qurmeti tarıhı oqıǵalarǵa negizdelgen. Sonymen birge aqynnyń qaıratkerlik qyry kóbirek ashylypty», deıdi memleket jáne qoǵam qaıratkeri Oralbaı Ábdikárimov. Qaıratkerdiń aıtýynsha, halyq kóbine sahnadan Sákenniń aqyndyq, jazýshylyq qyrlary men tragedııasyn ǵana kóretin. Al «Sáken – suńqar» dramasynda ol olqylyqtyń orny tolǵan.
Sáken rólin akter, Qazaqstannyń eńbek sińirgen qaıratkeri Syrym Qashqabaev somdady. Sonymen qatar spektaklde Qazaqstannyń eńbek sińirgen qaıratkerleri Bolat Ybyraev, Altynaı Nógerbek, Janqaldybek Tólenbaev, Boranbaı Moldabaev, sondaı-aq Samat Baıyrov, Janat Ospanov, Jánibek Musaev, Shah-Murat Ordabaev bastaǵan teatr akterleri óner kórsetti.
Sonymen qatar spektaklde sahna sýreti boıynsha Berik Bórbaev, mýzykasyn qurastyrýshy, kompozıtory – Qaırat Toqymbetov, kıim úlgisiniń sýretshisi retinde Shynar Elembaeva ter tókti. Al sahna saıysyn Oljas Dálelhan qoıdy.