Irgetasy sonaý 1968 jyly qalanǵan aýyl mektebinde sırk stýdııasy jumys isteıdi. Aqmola oblysyna qarasty Makınka aýlyndaǵy jalpy orta bilim beretin mektep janynan ashylǵan stýdııada 20 oqýshy sheberligin shyńdap júr. Sırk ónerpazdary qazirdiń ózinde respýblıkalyq, halyqaralyq baıqaýlarda top jaryp úlgergen eken.
«Juldyzdy jańbyr» dep atalatyn sırk stýdııasy joǵaryda atalǵan mektep dırektory Tolybaı Rahımjanovtyń bastamasymen 2019 jyly uıymdastyryldy. Alena Lıtovchenko ózi jetekshilik etetin stýdııada jas ereksheligi jaǵynan ártúrli oqýshylar shyǵarmashylyǵyn damytyp júrgenin jetkizdi.
«Stýdııada 7 jastan 16 jasqa deıingi 20 qyz ónerin shyńdap keledi. Mektep gımnastary osy kúnge deıin sırk stýdııasynda jınaǵan tájirıbesi men úırengen shyǵarmashylyq daǵdysyn qoıylymdar qoıýda kórsete bilip, kórermenderin qýantyp júr. Qazir aldaǵy jazda ótetin Halyqaralyq festıvalǵa daıyndyq júrip jatyr jáne «Halyq ujymy» ataǵyn qorǵaý shartymen 8 nómir, sonyń ishinde jeke nómirler de daıyndap jatyrmyz», dedi ujym basshysy A.Lıtovchenko.
Shyǵarmashylyqtyń shyńyna shyǵýdy qalaıtyn ujymnyń az ýaqyttaǵy jetistigi de jaman emes eken. Osy oqý oshaǵynyń basshysy T.Rahımjanov ónerli oqýshylarynyń jetistikteri jóninde: «Bizdiń oqýshylar túrli baıqaýdyń júldesin ıelendi. Aıtalyq, «Vivat Astana-2021» respýblıkalyq balalar jáne jastar shyǵarmashylyǵy konkýrsynyń 1-orny men Gran-prı júldesin oljalady. Sırk stýdııasynyń taǵy bir jetistigi, Astana qalasyndaǵy Halyqaralyq XX International EUROPEAN CONTEST-FESTIVAL «GERMANY–KAZAKHSTAN» festıvaline qatysyp, Gran-prı jeńip aldy», dedi.
Stýdııada sheberligin shyńdap júrgen 10-synyp oqýshysy Alına Ezova: «Sırk stýdııasyna 2021 jyly keldim, osy baǵyt meni qatty qyzyqtyrady, bul – meniń qazirgi hobbıim. Biz kún saıyn jańa nárse úırenemiz. Jattyǵýlar óte qyzyqty ótedi», dese, Alınanyń sózin qostaǵan 10-synyp oqýshysy Anna Skornıakova sırk stýdııasyna qatysqanyna bir jyldan asqanyn, qyzyǵyp keletinin, bolashaqta da sol baǵytty tańdaıtynyna senimdi ekenin aıtty.