Senat depýtaty Darhan Qydyráli elimizdegi tarıhı-mádenı muralardy saqtaý, qorǵaýdy júzege asyratyn zań qaýqarsyz ekenin aıtyp, depýtattyq saýal joldady. Ol qaýqarsyz qujat saldarynan qundylyqtarymyzdy qorǵaý qıyn bolyp turǵanyn aıtty, dep jazady Egemen.kz.
Depýtat ǵasyrlardan mura bolyp jetken tarıhı-mádenı oryndardy buzaqylar vandalızm arqyly búldirip jatqanyn jetkizdi.
«Qazaqstandaǵy 25 myń eskertkishtiń jartysyna jýyǵy ornalasqan Mańǵystaý óńirinde muralardyń kóbi tarıhı-mádenı eskertkishter tizimine engizilgenimen, olardy qaraýǵa maman jetispeıdi. Mádenı qabattardy «qara arheologtar» men buzaqylar túrli vandalızm arqyly búldirip jatyr. Jeti jurt kóshken mańǵaz mekendegi qorymdardyń qorshaý aýmaǵyna zańsyz qurylystar, beıitter salynyp ketken. Olarǵa qarsy qoldanystaǵy «Tarıhı mádenı murany qorǵaý jáne paıdalaný» zańy qaýqarsyz. Aıyppuly nebári 30 myń teńge ǵana! Ulytaýda Joshy kesenesiniń janyna áldebir qaltaly jaqynyn jerlep ketken, endi nysandy IýNESKO tizimine engizý múmkin bolmaı tur», dedi Senat depýtaty.
Ultymyzdyń uranyna aınalǵan rýhanı eskertkishter jekeniń menshiginde eleýsiz bolyp, baqsy-balgerlerdiń ortasyna aınalyp jatyr. Osy máselege mán berýdi usynǵan Darhan Qydyráli tarıhı keshenderdi ulttyq brend retinde IýNESKO-ǵa usyný isin júıelep, jedeldetý qajet ekeninine nazar aýdardy.
«Kıeli jerler shyraqshylardyń kún kóris kózine, baqsy-balgerlerdiń ordasyna aınalǵan. Olardyń keıbiri tarıhı oryndy saqtap otyrǵanymen, arnaıy bilim, ereje-qaǵıdattary men standarty joq. Tipti ultqa uran bolǵan Beket ata – jekeniń menshiginde! Pir Beket – bir qazaqtyń aıbary emes, ol – bar qazaqtyń baıraǵy! Halyqtyń rýhanı qalpyn qalyptastyrǵan mundaı tulǵalar mekeni qundylyq retinde memleket qaraýynda bolýy tıis», dedi ol.
Depýtat mádenı mura aınalasyndaǵy kúrmeýli máseleni sheshýdiń bes tetigin atady.