Jýyrda dzıýdodan Ázerbaıjan astanasy Baký qalasynda ótken Grand Slam dodasynda 48 kg salmaqta beldesken Ábıba Ábýjaqynova qola medal ıelendi. Endi 1-3 naýryz aralyǵynda О́zbekstannyń Tashkent qalasynda Grand Slam týrnıri ótedi. Reıtıngtik upaı úlestiriletin dodada úshtikke ený – Parıj Olımpıadasynyń joldamasyna qarys qadam jaqyndaı túsý degen sóz. Bakýdegi básekede erler men qyzdar quramasynan jalǵyz ózi júlde alǵan Ábıbany áńgimege tarttyq.
– Bıylǵy jyly qatysqan eki birdeı aıtýly dodada qola medal ıelendiń. Qańtar aıynda Portýgalııada ótken Gran-prı alamanynda úshtikke enip ediń. Araǵa az kún salyp Ázerbaıjanda da júldeli boldyń. Jaraqatyńnan qulan taza aıyǵa aldyń ba?
– Tolyqqandy jazyldym dep aıtýǵa áli erte, tipti ota jasatý kerek. Oǵan ýaqyt óte tyǵyz, qyr astynda Parıj Olımpıadasy tur. Sodan keıin ǵana ota jasatpasam, qazir úlgermeımin.
– Demek, Olımpıada oıyndaryna joldama alsań, jaraqatpen kúreske túsesiń be?
– Basqa qandaı amal bar? Qyrsyq qylǵanda ıyǵymnyń bir emes, eki jerinen eti sógilip, sińiri jyrtylyp ketip otyr. Qoldan keler bir ǵana qaıran – ıyqtyń bulshyq etin shynyqtyryp, jaraqatty ulǵaıtyp almaý ǵana. Týrnıkke tartylsam, qaqsap aýyrady.
Byltyrǵy jyldyń mamyr aıynda Qatar astanasy Dohada ótken álem chempıonatynda mońǵol qyzymen kúreskende jaraqattap aldym. Qarsylasym ıyǵymdy janshı qulaǵanda mertikti. Sodan beri emdelip kelemin. Iyǵymnyń jaraqatyn asqyndyryp almaı bappen jattyǵý jasatýdyń nátıjesinde dodaǵa qatysyp júrmin.
– Bakýde ótken Grand Slam týrnırinde jaraqatyń ashylyp kúresýge kedergi keltirgen sekildi.
– Árıne, qorynyp turasyń. Jaıshylyqta aýyrmaǵanymen oqys qımyl jasaǵanda, bolmasa ıyǵyńmen jer súze qulaǵanda syrqyrap aýyrady.
– Osy saıysta qola medalǵa talasyp, belgııalyq balýanmen kúrestiń. Qarsylasyń tym dórekilik tanytty.
– Onyń beldesý ádisi osyndaı ózi. Tobyqtan qaǵyp shalǵansyp, tepkeni úshin eskertý aldy. Kózimdi de shuqyp jiberdi. Belgııalyq dzıýdoshymen buǵan deıin de úsh ret kúresip jeńgenmin, aılakerligin jiti bilemin. Lýız Petıtpen dál osylaı kúresý kerek. О́rshelenip alǵa umtylyp ádis jasaımyn degenińmen qıyn bolady. Únemi osylaı ereje buzyp kúresetindikten taktıkamen basym túsýge umtyldym.
– Ázirge álemdik reıtıngte 9-satyda kelesiń. Dese de Parıj joldamasy úshin básekelestik óte joǵary bolyp tur ǵoı.
– Bizdiń salmaqta úzdik bestiktegi balýandar tegeýrindi dep qalǵanyna toqmeıilsip qaraýǵa bolmaıdy. О́ıtkeni reıtıngte 100-orynda turǵan sportshy barlyǵyn jaıpap ótýi bek múmkin. Kim-kimge de barymyzdy salyp daıyndyq júrgizý qajet.
Qazaq sportynyń tarıhynda dzıýdo kúresinen áıelder arasynda Olımpıada oıyndarynyń medalin oljalaǵan jergilikti balýan joq. Ras, 2021 jyly Tokıo tórinde Galbadrah Otgonseseg qola júldeger atandy. Mońǵolııadan shaqyrtqan balýannyń jetistigi orasan. Biraq qazaq qyzdary arasynda dzıýdo kúresinen Olımpıadanyń medalin ıelengen ázirge eshkim bolmaı tur. Osy olqylyqty bútindegim keledi.
– Bizde sporttyq medısınanyń damýy kósh keıin qalǵany da nátıjege aıtarlyqtaı áser etedi...
– Sporttyq medısınanyń qaýqaryn kóterý máselesi qozǵalyp, seń kóbesi sógildi. Biz qajetti dárýmenniń keıbirin óz aqshamyzǵa satyp alamyz. Mınıstrlikten de beriledi. Sporttyq medısınany damytpaı nátıjege umtylý bos áýreshilik. Álem muny aıqyndap otyr. Bizde ıaǵnı dzıýdodan qyzdar quramasynda massajıst, dáriger de turaqty emes, ár oqý-jattyǵý jıyny saıyn aýysyp otyrady. Endi turaqty maman bekitetin shyǵar. Elimizde sporttyq medısınaǵa kóńil bólip, sharýany qolǵa alýy qýantady. Sonyń bir aıǵaǵy retinde ulttyq quramaǵa Fransııadan shaqyrtqan mamandardyń bizge orasan paıdasy tıip jatyr. Fızıoterapevttiń nusqaýymen em-dom alyp, fızıkalyq áleýetimizdi nyǵaıtyp kelemiz. Eýropadan kelgen mamandar eńbegi aldaǵy ýaqytta nátıjesin beredi dep oılaımyn.