Qazaqstannyń segiz oblysynda aýa raıyna baılanysty eskertý jarııalandy, dep habarlaıdy Egemen.kz.
«Qazgıdromet» RMK baspasóz qyzmeti usynǵan boljamǵa sáıkes, kúndiz Qaraǵandy oblysynyń batysynda jáne ońtústiginde burqasyn bolady.
Shyǵys Qazaqstan oblysy men О́skemen qalasynda túnde -40 gradýs qatty aıaz saqtalady.
Túnde Abaı oblysynda -40 gradýsqa deıin qatty aıaz bolady.
Ulytaý oblysynyń soltústigi men shyǵysynda burqasyn kútiledi. Al Jezqazǵanda qarly boran soǵady.
Sınoptıkterdiń boljamyna qaraǵanda, Mańǵystaý oblysynyń batysynda, soltústik-shyǵysynda jáne ortalyǵynda kóktaıǵaq, tuman bolady. Aqtaýda da túnde kóktaıǵaq bolady.
Túrkistan oblysynyń soltústiginde, batysynda, taýly jáne taý bókterindegi aýdandarynda kóktaıǵaq bolady. Oblystyń ońtústiginde, batysynda, taýly jáne taý etegindegi aýdandarynda tuman túsedi. Oblystyń taýly asýlarynda ońtústik-batystan 15-20 m/s bolatyn jel soǵady. Shymkentte túnde jáne tańerteń tuman túsedi.
Jetisý oblysynyń taýly aımaqtarynda túnde -27 gradýs aıaz bolady. Alakól aýdanynda shyǵystan soǵatyn jeldiń ekpini 15-20 m/s jetedi.
Qyzylorda oblysynyń soltústiginde, ońtústiginde jáne ortalyǵynda tuman boljanyp otyr. Qyzylordada keı jerlerde tuman túsedi.