Oraldyq krımınalıst Rýslan Dosqalıev 8 mln teńge jymqyrǵan baýkespe uryny saýsaq izderi arqyly tapty.
Oral qalalyq Polısııa basqarmasyna qarasty Shaǵan polısııa bólimi jedel-krımınalıstıkalyq tobynyń krımınalısi Rýslan Dosqalıev terezede qalǵan saýsaq izderi arqyly páter urlyǵyn ashty.
Oqıǵa 2023 jyly qyrkúıek aıynda bolǵan edi. Sol kezde 102 operatoryna habarlasqan jergilikti turǵyn sarymaıdaı saqtap júrgen qomaqty qarjysy seıften urlanǵanyn habarlaǵan. Oqıǵa ornyna dereý jedel-tergeý toby jetti.
Polısııanyń anyqtaýyna qaraǵanda, belgisiz bireý Oral qalasyndaǵy turǵylyqty úılerdiń birine terezesin syndyryp kirip, seıften 10 myń dollardy jáne 3 mln 700 myń teńge aqshany urlap ketken. Árıne, bul jerde naǵyz mamannyń qyraǵylyǵy, kásibı sheberligi qajet edi. Polısııa maıory R.Dosqalıev oqıǵa ornyn, qylmyskerdiń kelip-ketý jolyn jan-jaqty tekserip shyqty. Nátıjesinde, ury kirgen terezeden saýsaq izderin tapty.
Bir qyzyǵy, krımınalıstıkalyq esep bazasyndaǵy úlgiler arqyly kúdiktiniń kim ekeni anyqtaldy. Ol 33 jastaǵy oblys ortalyǵynyń turǵyny eken.
Júrgizilgen jedel izdestirý is-sharalary nátıjesinde táýlikke jetpeıtin ýaqyt ishinde kúdikti ustaldy. Baýkespe urlanǵan aqshany túgel jumsap úlgermepti. Qalǵan qarjy tárkilenip, zańdy ıesine qaıtaryldy.
Jaqynda Oral qalalyq qylmystyq sotynyń sheshimimen kúdikti sottalyp, bes jylǵa bas bostandyǵynan aıyryldy.
Batys Qazaqstan oblysy