Ilon Masktiń chıpi alǵash ret adamnyń mıyna engizildi. Bul týraly mıllıarder X áleýmettik jelisinde habarlady. Mıynda Neuralink chıpi bar birinshi adam «oı kúshi» kýrsoryn basqara aldy.
Birneshe apta buryn Ilon Masktiń Neuralink startapy birinshi adamnyń mıyna neıroımplant engizgen edi. Qazir belgili bolǵandaı, otadan keıingi saýyqtyrý sátti ótken. Naýqas ımplantasııa múmkindikterin qoldana bastady. Qurylǵy oılaý arqyly telefondy nemese kompıýterdi basqarýǵa múmkindik beredi. О́nertapqyshtyń aıtýynsha, alǵashqy paıdalanýshylar aıaq-qoldary jansyzdanǵan jandar bolmaq. Bul ǵylymı tóńkeris «Telepatııa» degen ataý aldy.
– Keshe birinshi adamǵa Neuralink chıp saldy. Ol qazir qalpyna keldi. Bastapqy nátıjeler neırondyq júıelerdiń anyqtalýyna baılanysty, – dep jazdy Mask.
Ilon usynǵan tehnologııanyń basty jetistikteriniń biri – ınterfeıstiń symsyz jáne shaǵyn bolyp shyqqany. Implant neırohırýrgııalyq robot engizgen elektrodtar jáne juqa polımerli jipterden turady. Sonymen qatar chıpte sıgnal berýge arnalǵan qýatty shaǵyn kúsheıtkishter bar. Bir eskerer dúnıe, Masktiń komandasy buryn neıroımplantasııamen aınalysqandardyń barlyǵynda kezdesetin eń úlken máseleni sheshti. Ol – bıoúılesimdilik pen qaýipsizdik.
Buǵan deıin bul nátıjege jetý úshin janýarlarǵa birqatar synaq jasalǵan edi. Synaq barysynda maımyldar tek mıdy paıdalanyp kompıýterlik oıyndar oınaıtyn deńgeıge jetken. Bul tájirıbeler janýarlar quqyǵyn qorǵaý toptaryn dúr silkindirip, narazylyq ta týǵyzdy. Degenmen AQSh-tyń Azyq-túlik jáne dári-dármek basqarmasy 2023 jyldyń mamyrynda Neuralink kompanııasyna adamǵa klınıkalyq synaqtar júrgizýge ruqsat berdi.
Eske sala keteıik, Neuralink – 2017 jyly Ilon Mask negizin qalaǵan alyp kompanııa. Ol sol kezden bastap jaraqat alǵan adamdarǵa tek óz oılaryn qoldana otyryp, gadjetterdi basqarýǵa kómektesetin ınterfeıs qurylǵysy kelgen edi. Endi sol maqsatyna jetken de sekildi.