Aqtóbe qalasynyń №2 soty oblystyq Tótenshe jaǵdaılar departamenti jedel kezekshisiniń kómekshisine qatysty úkim shyǵardy, dep habarlaıdy Egemen.kz.
Sottalýshy Qylmystyq Kodekstiń 271-baby 1-bóligi boıynsha fýnksıonaldyq qyzmetine salǵyrttyq tanytqany úshin aıyptalǵan edi. О́tken jyldyń 29 naýryzy kúni Aqtóbe qalasy Turǵyn úı qalashyǵynda túnde páterge qylmysker kirip, uıyqtap jatqan 35 jastaǵy áıel men onyń 16 jastaǵy ulyn óltirip, 13 jastaǵy qyzǵa pyshaq jaraqatyn salady da, balkonnan shyǵyp ketedi. Jaralanǵan qyz bar kúshin jıyp, «112» qyzmetine shuǵyl kómek kórsetýdi surap qońyraý shalǵan. Sol kúngi kezekshi I.-diń habarlamasyna den qoımaı, bireýler oınap tur dep qabyldaıdy. Aýyr jaraly I. birneshe ret telefon soqqanymen, esh nátıje bolmaǵan. Tek 50 mınýt ótkende, I-diń kómek suraǵan úshinshi qońyraýynan keıin jábirlenýshiniń habarlamasy jedel járdem qyzmetine jiberiledi.
Aıyptalýshy B. sot kezinde kinásin tolyq moıyndamady jáne alǵashqy qońyraýdy balalardyń oıyny dep sanaǵanyn aıtty. Onyń aıtýynsha, kómek suraǵan bala alǵashqy ret qońyraý soqqanda úzilip ketken. Kezekshi ózi I-ǵa qaıta qońyraý shalǵanda, telefony jaýap bermeıdi. Úshinshi qońyraýdan keıin I.-dan bolǵan jaǵdaıdy anyqtap, onyń habarlamasyn jedel medısınalyq kómekke jiberdi.
Sýdıa jábirlenýshiniń paıdasyna 1 mıllıon tenge moraldyq zııan óndirýdi jáne qyzmetine salǵyrttyq tanytqan TJD kezekshisine alty aıǵa bas bostandyǵynan aıyrý jazasyn taǵaıyndady.