Ásilinde áıeldiń zaty názik, júregi jumsaq deımiz. Áıtkenmen yqylym zamannan beri el basyna qater tóngende erlermen qatar jaýǵa qarsy turyp, aýyr jumystardy atqarǵan analar az emes. Adamzattyń osy bir ádemi jaratylysy ejelden-aq ózderiniń batyl áreketterimen álemge áser etip, tarıhtyń baǵytyn ózgertýge qaýqary jetken.
Qazir de temirdeı tártipke baǵynatyn quqyq qorǵaý salasynda erlermen qatar ıyq tirestire qyzmet etip jatyr. Olardyń arasynda bir qolymen besikti terbetip, ekinshi qolymen halyqtyń tynyshtyǵyn kúzetken kópbalaly analar da az emes. Bizdiń keıipkerimiz Aıgerim Kómekbaeva – túzde tergeýshi, úıde otbasynyń uıytqysy bolǵan aıaýly ana.
Temirdeı tártipke baǵynatyn quqyq qorǵaý salasyndaǵy jaýapkershiligi joǵary, mindetin otbasyndaǵy qyzmetimen qatar qoıatyn polısııa qyzmetkeri «Eldiń tynyshtyǵyn qorǵaýda kirpik qaqpaı qyzmet etý – Otan aldyndaǵy abyroıly mindetim. Otbasyndaǵy jylylyqty saqtap, balalaryma tálim-tárbıe berý – analyq mahabbatymnyń ólshemi. Al eki ıyǵyma artylǵan jaýapkershiliktiń júgin árqashan bıik ustaý – úlken mártebe», deıdi. О́mirlik serigi Asadýllabek Sopaev ta talaı jylyn quqyq qorǵaý salasyna arnaǵan. Sondyqtan da bolar, sapta júrgen serigin kez kelgen sátte qoldap, ár isinde demeý berýge daıar ekenin aıtady.
«Men de ózge áriptesterim sekildi bala kúnimde túrli kásip ıesi bolýdy armandaǵanmyn. Mektep bitirer jyly júrek qalaýym adamdarǵa kómektesýge arnalǵan joldy tańdaýǵa tústi. Sóıtip, 2008 jyly Taraz qalasyndaǵy Halyqaralyq qazaq-túrik ýnıversıtetine oqýǵa tústim. Keıin bolashaq zańger mamany retinde tájirıbelik jumysqa alyndyq. Maǵan ishki ister organdarynyń ishki ashanasymen tanysý tapsyryldy. Sodan bastap mamandyǵyma degen qurmetim artty. Polısııa formasyn kıgen soń taǵdyrymdy birjola quqyq qorǵaý salasymen baılanystyrýǵa sheshim qabyldadym», deıdi ol.
Qoǵam tynyshtyǵyn kúzetý jolyn 2008 jyly Jambyl oblysy PD JBO-nyń 102 operatary laýazymynan bastaǵan Aıgerim qazir talaı istiń ashylýyna septigin tıgizip júrgen tisqaqqan tergeýshige aınaldy. Eki jyldan beri Baıqońyr aýdany PB anyqtaý bólimine aýysqan ol qaýyrt tirlikte júrse de, otbasynda shańyraqtyń tútinin túzý ustap, urpaq tárbıesin umyt qaldyrǵan kezi joq. Tórt balanyń anasy atanǵan tergeýshiniń aıtýynsha, adam taǵdyry sheshiletin jaýapty jumysynda júrip, jaqyn jandarǵa jylylyq syılaı bilý de kerek. «Qyzyǵy men shyjyǵy kóp bul qyzmet ómirge degen kózqarasymdy ózgertti. Aldyńa kelgen adamdy tergep, onyń taǵdyryn sheshý ońaı is emes. Alaıda jumystaǵy aýyrtpalyqty úıimniń syrtyndaǵy tabaldyryqta qaldyryp ketemin. Sebebi jumystaǵy kúızelis jaqyndaryma syılaıtyn jylýǵa áser etpeýge tıis. Menińshe, qyzmet pen otbasyn abyroımen alyp júrý – kez kelgen áıel úshin úlken jumys. Biraq eki jaqta da júrek tańdaýyń jańyldyrmaǵan bolsa, áıel úshin alynbaıtyn qamal bolmaıdy. Tek serigińniń qoldaýy men kásibińe degen adaldyq bolsa jetip jatyr. Sodan da bolar, jumysqa da úlgeremin, otbasyma da ýaqyt tabýǵa tyrysamyn», deıdi Aıgerim Jaqypbaıqyzy.
Birligi men berekesi jarasqan otbasynda áke tárbıesin, ana mahabbatyn sezinip ósken balalar da shetinen ónerli. Mektepte oqıtyn úsh balasy úlgili oqýshy. Búginde ártúrli sporttyq seksııa men óner úıirmesine qatysyp, júldeli oryndardy ıelenip júr. Al úıdiń kenjesi balabaqshaǵa baratynyn aıtqan anasy: «Ol – bizdiń úıdiń erkesi ǵana emes, bastyǵy», dep ázildep te aldy. «Alǵash ana, áke atanǵanymyz áli esimizde. Tuńǵyshymdy dúnıege ákelgen kezde ákesi qaraqshylyq is boıynsha qylmyskerdi ustaýǵa Almatyǵa ketken edi. Súıinshi habardy estigende tóbesi kókke jetkendeı qýandy. Otbasylyq ómirimizdegi bir-birimizge bergen qoldaýymyz qyzmet jolynda da túrli qıyndyqty jeńýge kómektesedi», dep aǵynan jaryldy.
Sóz arasynda qoǵam tynyshtyǵy jolyndaǵy qyzmettiń aýyrlyǵy áıeldiń boıyndaǵy náziktikti joǵaltyp almaı ma degen suraǵymyzǵa: «Kerisinshe, aldyma kelgen kez kelgen is ózimdi adam retinde tanýyma septigin tıgizedi. О́ıtkeni jábirlenýshi men kúdiktiniń arasyndaǵy qarym-qatynasty zertteý arqyly aınalamyzdaǵy jandarǵa jylylyq kerek ekenin odan saıyn sezine túsesiń. Bir joly adam bótenniń kóligin zańsyz aıdap ketken bir jigittiń isin tergedim. Kólik jýý ortalyǵynda jumys istep júrgende balalyqpen ózi jýǵan kólikti túngi ýaqytta zańsyz aıdap, qala ishinde ábden qydyrǵan. Tún jarymda anasyna kólik júrgize alatynyn aıtyp maqtanyp ta alǵan. О́zi keshe ǵana kámelettik jasqa tolǵan. Jastyqtyń býymen júrip, kólikti qatty jyldamdyqpen aıdaımyn dep kameraǵa túsip qalǵan. Kólik jýý ortalyǵyna jetken ýaqytta jol-kólik oqıǵasyna ushyraǵan. Oılanbaı istegen áreketi qylmystyq iste kúdikti retinde tanylyp, sot úkimimen qylmystyq jaýapkershilikke tartýǵa deıin apardy. Ana retinde balaǵa aıaýshylyq tanytýǵa bolar edi. Biraq zań aldynda barlyǵymyz birdeımiz. Bul isten ne túıdim? Ákeniń meıirimin, ananyń aıaly alaqanyn, otbasynyń tálim-tárbıesin kórgen balanyń bolashaǵy jarqyn bolary haq. Sondyqtan qansha jerden jaýapty jumysta júrsek te, adam balasy úshin urpaq tárbıesinen asqan mańyzdy mindet joq», deıdi.
Tarıhta túrli kezeńde el bılegen áıel basshylar adamzattyń damýyna baǵa jetpes úles qosqan. Máselen, áıgili saq patshasy Tomırıs «tórt qubylanyń tutas bıleýshisi» atanǵan parsynyń áıgili patshasy Kırdiń tas-talqanyn shyǵaryp, basqynshylardan táýelsizdigin saqtap qalǵanyn keıingi urpaq áli jyr qylyp aıtady. Qazir de elge adal qyzmet ete júrip, bala-shaǵanyń babyn taýyp, áýlettiń yryzdyǵyn arttyryp júrgen burymdylar barshylyq. «Men, eń aldymen, Premer-mınıstrmin, sodan keıin áıelmin», degen áıgili saıasatker Margaret Tetcher de «úıdi basqarýdaǵy týǵan máselelerdi túsinetin áıel el basqarýdaǵy máselelerdi de túsinedi» dep beker aıtpasa kerek-ti.