Búgin Atyraý qalasynda Ulttyq quryltaıdyń úshinshi otyrysy ótti. Áz Naýryz qarsańyndaǵy bul jıynnyń Jaıyq jaǵasynda, tarıhta han ordasy atanǵan Saraıshyq qalasy janynda uıymdastyrylýy da beker emes. Ulttyq quryltaı qoǵamdaǵy aıtylyp júrgen máseleler qaralatyn, qarapaıym halyq kóterip jatqan jaıttar ortaǵa salynatyn orta. Bul eldigimiz ben egemendigimizdi, birligimiz ben berekemizdi bekemdeıtin máseleler kóteriler jer.
Bul joly da Quryltaı jumysyna qatysqan Prezıdent Qasym-Jomart Toqaev biraz dúnıeler týraly oı tolǵap, ortaq sheshimder jasaý kerektigin aıtty.
- Sózin halyqtyń birligi, ulttyń tatýlyǵy taqyrybynan bastaǵan Prezıdent el aǵalary arasyndaǵy aýyzbirshilikke de toqtaldy. Qazaqtyń qaımaǵy, ulttyń maqtanyshy bolǵan adamdar urpaqqa ónege bolatyn kesek áńgime aıtýy qajet, - dedi Prezıdent. Aıtpasyna bolmady.
Tarıhı tulǵalardyń rólin salystyryp, bir-birine qarsy qoıyp jatqandardy da synady. Ár zamannyń óz shyndyǵy bar, biraq tarıh tutas. Bul halqymyzdyń júrip ótken joly. Áleýmettik jeli men baspasózde belgili adamdardy bir-birine qarsy qoıǵannan túk utpaımyz. Syrt kózdiń synyndamyz!
Bos sóz, jeleń áńgimege úıirmiz. Esesine kitap oqymaıtyn urpaq ósip kele jatyr. Úıdegi balanyń kámelettik jasqa kelgenshe bir kitap oqymaǵanynda sharýamyz joq, esesine áleýmettik jelide bireýdiń qyrylysqanyna rızamyz. Aldaǵy ýaqytty «Ulttyq kitap kúni» belgilenýi múmkin. Durys bastama dep oılaımyn.
Prezıdent qazaq tili bıznestiń, ǵylym men tehnıkanyń tiline aınala bastaǵanyn aıtty. Bul úrdisti odan ári damytýdyń eń tıimdi ári tóte joly – aǵartýshylyq ekendigin taǵy da qaıtalady.
«Men ekonomıkany damytý úshin «Kreatıvti ındýstrııanyń» mán-mańyzy zor ekenin únemi aıtyp júrmin. Bul memlekettik tildiń bolashaǵy úshin de óte mańyzdy. Qazaq tilin damytamyz desek, qazirgi zamanǵy ádis-tásilderdi barynsha tıimdi paıdalanǵan durys», dedi Memleket basshysy.
Keı kezde bizdiń qoǵam men úshin ózgeniń qańsyǵyna tez eliktegish, teris dúnıege ımmýnıteti múlde joq álsiz qoǵam bolyp kórinedi. Qaı-qaıdaǵy esirtki, eliktirgish zattar bizdi tabady. Utys oıynynyń san túri bizge kirip alǵan. Qanshama adam lýdomanııanyń qurbany bolyp, óziniń de, ózgeniń de ómirin buzyp jatyr. Jat uıymdar kelip, dástúrli uǵymdarymyz ben qundylyqtarymyzǵa shabýyl jasap jatyr. Áıeldi kemsitip, óltirip qoıý saý adamdar jasaıtyn dúnıe emes qoı!
Eline, halqyna arasha túsken Prezıdent «Biz halqymyzdyń rýhanı negizin qurmetteı otyryp, memleketimizdiń zaıyrly el retindegi mártebesin kúsheıte túsýimiz kerek. Qazaqstan óziniń memlekettiligine jáne qoǵamdyq moraline qaıshy kelmeıtin dinı nanym-senimderdiń, túrli tanymdar men ilimderdiń bárine túsinistikpen qaraıdy. Biraq biz batystyń, ıa bolmasa basqa da kózqaras ıeleriniń yqpalymen tól mádenıetimizge jat ári álemniń dýalıstik negizine kereǵar qundylyqtardy nasıhattaýshylardyń jetegine erip kete almaımyz, ketpeımiz de!» dep, otbasy ınstıtýty men rýhanı damyǵan qoǵamymyzdy saqtaýǵa shaqyrdy.
Ásem Rahmetova,
Parlament Senatynyń depýtaty