«Qazgıdromet» RMK Qazaqstan boıynsha 16-18 naýryzǵa arnalǵan aýa raıy boljamyn jarııalady, dep habarlaıdy Egemen.kz.
Sınoptıkterdiń boljamynsha, aldaǵy úsh kúnde batysta, soltústik-batysta, apta sońynda Qazaqstannyń shyǵysynda, 17-18 naýryz kúnderi Qyzylorda oblysynda atmosferalyq frontaldy bólikterdiń ótýine baılanysty turaqsyz aýa raıy saqtalady. Jaýyn-shashyn bolady.
18 naýryzda Batys Qazaqstan, Atyraý oblysynda, 17 naýryzda Mańǵystaý oblysynda qatty jaýyn-shashyn, jańbyr aralas qar jaýady.
16-17 naýryzda Túrkistan oblysynda, 17-18 naýryzda elimizdiń soltústik, ońtústik-shyǵys jáne ortalyq oblystarynda, 18 naýryzda Shyǵys Qazaqstanda jaýyn-shashynsyz aýa raıy saqtalady.
Respýblıkanyń barlyq aýmaǵynda jel kúsheıedi, tuman, kóktaıǵaq, soltústikte, shyǵysta jáne ortalyqta jaıaý borasyn soǵady.
Respýblıkanyń ońtústik jartysynda aýa temperatýrasy birtindep 8-20 gradýsqa, soltústik jartysynda 0-8 gradýsqa deıin kóteriledi.