Máskeý mańyndaǵy Krasnogorsk qalasyndaǵy Crocus City Hall ǵımaratynda bolǵan terakt kezinde 15 jastaǵy mektep oqýshysy Islam júzden astam adamdy qutqaryp qaldy, dep habarlaıdy Egemen.kz TASS agenttigine silteme jasap.
«Komsomolskaıa pravda» gazetiniń jazýynsha, segizinshi synyp oqýshysy ortalyqtyń garderobynda jumys istep, tabys taýyp júrgen.
Islamnyń aıtýynsha, ol adamdardy ǵımarattan jarty saǵattaı ýaqyt ishinde alyp shyqqan.
«Dál 23:00-de atys estildi. Men birden adamdardy shyǵarýǵa júgirdim. Biz qosalqy esiktiń qaıda ornalasqanyn bilemiz. Men ketsem, júzdegen adam óletinin túsindim. Qolymnan kelgenshe barlyǵyna kómektestim, ózimdi batyr dep sanamaımyn», dedi Islam «Komsomolskaıa pravda» gazetine bergen suhbatynda.
Lańkestik áreket pen sonyń saldarynan bolǵan órt kezinde Islam jurtshylyqqa jol kórsetip, baǵyt-baǵdar berdi. Kópshiliktiń dárethanaǵa qaraı tyǵyryqqa tirelgenin baıqaǵan jasóspirim evakýasııa júrgizýdi óz qolyna alǵan. Ol adamdardy tar ótkelden Ekspo aýmaǵyna, odan ári keńse ǵımaraty arqyly kóshege – qaýipsiz jerge shyǵara aldy.
Ol bos ýaqytynda garderobta jumys isteıdi jáne fýtboldan «Spartak» balalar komandasynda oınaıdy.
Tergeý komıtetiniń sońǵy málimeti boıynsha, Máskeý oblysyndaǵy Crocus City Hall konsert zalyna jasalǵan shabýyldan 133 adam qaza boldy, 140 adam jaraqat aldy.
Osyǵan deıin 11 kúdikti ustalǵany, onyń ishinde tórteýi shabýylǵa tikeleı qatysy bary habarlandy.