Tasqaırat – úshinshi toptaǵy múmkindigi shekteýli jan. Jigerli jas jýyqta bıznes-josparyn sátti qorǵap, memleketten bólingen qaıtarymsyz grant utyp aldy. Búginde aǵash sheberhanasyn ashyp, jergilikti turǵyndardyń tapsyrysyn qabyldaı bastaǵan.
Jas kásipker byltyr «Bıznes bastaý» kýrsynan ótip, 1 mln 380 myń teńge qaıtarymsyz grant utyp alypty. Ol qarajatqa aǵash sheberhanasyna arnalǵan qural-jabdyqtar aldyryp, dástúrli jınalmaly dóńgelek ústelder, oryndyqtar, esikter jáne t.b. ónimder jasaýǵa kirisip ketken.
– Reseıden aǵash kesetin, jonatyn, súrgileıtin, órnek salatyn 5 stanokty tapsyryspen aldyrdym. Bul kásipti bastaǵanda áýel basta qorqynysh bolǵan. Deıturǵanmen buǵan deıin Astana qalasynda aǵash sheberhanasyndaǵy eńbek tájirıbem maǵan úlken kómek boldy. Stanoktar men qural-saımandardy ıgergenimniń nátıjesin endi kórip jatyrmyn. Bala kezimde úı qoıandary men kógershinder ósiretinbiz. Olarǵa arnap torlar, úıshikter jasadyq. Aǵashtan buıym jasaý óneri sol kezden qalyptasyp qalǵan syndy. Qazir aǵashtan jáne faner kesikterinen túrli buıym jasap jatyrmyn. Eń áýeli jınalmaly dóńgelek ústeldiń jeńil túrin shyǵarǵym keledi. Kóp nusqany jasap kórdim, ázirshe tıisti nátıjege jetken joqpyn. Ústel alyp júrýge qolaıly, sapaly ári jyldam qurylatyn bolýy kerek, – dep óz kásibi jaıynda áńgimeledi Tasqaırat Jeńisov.
Ol óz kásibin qarapaıym ǵana garaj qoımasynda bastaǵan. Qarajatqa qol jetkizgen soń garajdyń tóbesin jóndep, edenine beton quıǵan. Elektr jelisi men jylý tartyp, qabyrǵalaryn jylý ustaǵysh materıaldarmen qaptapty. Endi óz tirligine alańsyz kirisip jatyr.
Ázirshe sheberhanada jalǵyz ózi jumys isteıdi. Aıtýynsha, sapaly shıkizatty tabý qıyn. Jergilikti jerde aǵash óńdeıtin sehtar joqtyń qasy, al syrttan keletin buıymnyń sapasyn tap basý qıyn. Elektr quraldary men usaq fýrnıtýralardy kóbine Pavlodar qalasyna baryp ákelip júr.
«Eń áýeli aýyl adamdaryn kúndelikti ómirine qajet buıymdarmen qamtamasyz etýdi uıǵaryp otyrmyn. Qazir turǵyndardan dala dárethanalary, dóńgelek ústelder, jumsaq oryndyqtarǵa tapsyrystar túsip jatyr. Kópten josparlap júrgen jumystarymnyń alǵashqy kezeńin eńserdim, endi keleshekte buıymdarymnyń assortımentin kóbeıtý kerek», dep oı bólisti.
Tasqaırat sóz sońynda qaıtarymsyz grant aýyldaǵy ózi sııaqty jastar úshin kásip ashýda úlken kómek bolyp otyrǵanyn jetkizdi. Sheberhana ıesi aldaǵy ýaqytta qolynan is keletin azamattardy jumysqa qabyldap, kásibiniń aýqymyn keńeıtýdi josparlap otyr.
Pavlodar oblysy,
Baıanaýyl aýdany