Qapyda qarǵyn sýdyń astynda qalǵan aǵaıynnyń jaǵdaıyna qyzylordalyqtar da alańdaýly. Apat habary estilgennen-aq Qyzylorda oblysy TJD kúsh-quraldary avarııalyq-qutqarý jumystaryn júrgizýge qosalqy kúsh retinde Qostanaı oblysyna jiberildi.
Oblystyq TJD tótenshe jaǵdaılardy joıý basqarmasynyń bastyǵy, azamattyq qorǵaý podpolkovnıgi Jandos Dosymov bastaǵan 31 adamdyq qutqarý jasaǵy, 6 tehnıka, 10 motopompa, 2 qaıyq 27 naýryzda Qostanaı oblysyndaǵy Amangeldi aýdanyna jetip, jumysty bastap ketti. Áýelgide olar Amangeldi aýylyndaǵy Abaı, Palýan, Bodanov kóshelerindegi erigen qar sýyn tartty.
«Kelesi kúni bizdiń jigitter Amangeldi aýylynan 9 shaqyrym jerdegi Shyntas fazendasynan 5 adamdy qutqaryp, olardy qaýipsiz jerge shyǵardy. 10 myń tekshe metr sý tartty. Táýliktik kezekshilik uıymdastyryldy», deıdi oblystyq TJD «О́SjAQJQ» RMM bastyǵynyń orynbasary Baýyrjan Ospanov.
Qyzylordalyq qutqarýshylar búginge deıin motopompalar kómegimen 22 398 tekshe metr sý tartyp, 25 adamdy qutqaryp qalypty. Jaıylǵan sýmen alysyp júrip, «Dáýlet» sharýa qojalyǵynyń júzden asa malyn qaýipsiz aımaqqa shyǵardy. Deńgeıi kúrt kóterilgen Jaldama ózeniniń jaǵasyn nyǵaıtypty. Elektr júıesiniń mamandaryna sý tasqynynan zaqymdalǵan baǵanalaryn qalypqa keltirýge kómek bergen.
Aıtyp kelmeıtin apat kezinde kásibı biliktilik tanytqan qutqarýshylarǵa qostanaılyqtar alǵys aıtyp jatyr. Al 1 sáýirde oblystyq tótenshe jaǵdaılar departamenti qutqarý jasaǵynyń 35 adamy men 3 tehnıkasy, 10 motopompasy, 2 qaıyq Atyraýdaǵy aǵaıynǵa kómekke attandy.
Qyzylorda