Oqıǵa 10 sáýir kúni Taraz qalasyndaǵy Jambyl oblystyq perınataldyq ortalyǵynda boldy. Aqparatty oblystyq Densaýlyq saqtaý basqarmasynyń baspasóz qyzmeti rastady, dep jazady Egemen.kz.
Aıaǵy aýyr kelinshek júktiliktiń on altynshy aptasynda bolǵan.
«Júkti áıel jalǵan tolǵaq dıagnozymen OPS baqylaýynda bolyp, tıisti em alyp jatqan. Onyń boıynan psıhologııalyq aýytqýlar baıqalmaǵan. Oqıǵa ornynda jedel-tergeý toby jumys istedi. Quqyq qorǵaý organdary ózin-ózi óltirýge ıtermeleý boıynsha sotqa deıingi tergeý amaldaryn bastady, sot-medısınalyq saraptama júrgizilip jatyr. Aqparat tergeý aıaqtalǵannan keıin jarııalanady», delingen resmı málimette.
Marqumnyń artynda 3 balasy qaldy, olardyń úlkeni 6 jasta bolsa, ekeýi balabaqshaǵa barady.
Polısııa departamenti oqıǵa boıynsha qylmystyq is qozǵalyp, jan-jaqty tekserý jumystary júrgizilip jatqanyn habarlady. Al keshendi saraptamany oblystyq sot saraptamasy ınstıtýtynyń mamandary júrgizedi.