Memleket basshysy «QR-nyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» jáne «QR-nyń Ákimshilik quqyq buzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» Zańdarǵa qol qoıǵany málim. Osy oraıda Senat depýtaty Bekbol Orynbasarov áleýmettik jelide jazba jarııalady, dep habarlaıdy Egemen.kz.
Senat depýtaty Facebook áleýmettik jelisindegi jazbada atalǵan zańdar bir top Parlament depýtatynyń bastamasymen ázirlengenin aıtyp, zańnyń negizgi maqsaty – áıelder men balalardyń quqyqtaryn, zańdy múddelerin qorǵaý sharalarynyń tıimdiligin arttyrý ekenin atap ótti.
«Qazirgi ýaqytta, ókinishke qaraı, qoǵamda otbasyndaǵy zorlyq-zombylyq jáne turmystyq quqyq buzýshylyqtar tolastamaı tur. Abıýzerler tarapynan áıelderi men balalaryn asa qatigezdikpen uryp soǵyp jatqan faktilerdi jıi kórip otyrmyz. Qalyptasqan jaǵdaılar óskeleń urpaqtyń psıhıkasyna keri áser etetini jáne olardyń damýyn tejeıtini sózsiz», dep jazdy depýtat.
Senator atalǵan máselelerdi ret-retimen sheshý maqsatynda elimizde áleýmettik baǵyttaǵy quqyqbuzýshylyqtardyń jazasyn qatańdatý úshin birqatar júıeli sharalar qabyldanyp jatqanyn tilge tıek ettI.
«Ishki ister mınıstrligi qurylymynda áıelderdi zorlyq-zombylyqtan qorǵaý boıynsha arnaıy bólimsheler quryldy. 2021 jyly olardyń shtat sany 256 birlikke deıin ósti. Qazir mundaı laýazymdar árbir qalalyq jáne aýdandyq polısııa organynda bar. Sondaı-aq áıelder men kámeletke tolmaǵandarǵa qatysty jynystyq zorlyq-zombylyq qylmystaryn tergeý boıynsha áıel tergeýshilerdiń mamandanýy engizildi», delingen jazbada.
Bekbol Orynbasarov endi kámeletke tolmaǵandardy qorlaý (qorqytý, kıberbýllıng) jáne 16 jasqa tolmaǵan balany qoǵamdyq kólikten májbúrlep túsirý, sondaı-aq basqa da túzetýler úshin ákimshilik jaýapkershilik belgilengenin eske saldy.
«Munyń barlyǵy qoǵamda qylmysqa múldem tózbeýshilikti ornatýǵa baǵyttalǵan. Bul sharalardyń qabyldanýy – quqyqtyq qoǵam qurý jolyndaǵy mańyzdy qadam», dep jazdy Bekbol Orynbasarov.