Elimizde turaqtylyqty, birlikti saqtaıtyn ınstıtýttyń mindetin Qazaqstan halqy Assambleıasy atqaryp otyr. Prezıdent Qasym-Jomart Toqaev atap ótkendeı, Assambleıa – jasandy uıym emes, el birligin naqty júzege asyratyn, konstıtýsııalyq mártebesi aıqyn qoǵamdyq organ.
Qazirgi keı óńirlerdegi tótenshe jaǵdaıdan Assambleıanyń ár múshesi de shet qalmady. О́ńirlik shtab jasaqtalyp, «Júrekten – júrekke» arnaıy naýqanyn bastady. 12 myńnan astam eriktini jumyldyryp, 80-nen astam júk kóligimen 1,5 myń tonnaǵa jýyq azyq-túlik jóneltti. 40-qa jýyq tehnıka men 770 mıllıonǵa jýyq qarjylaı járdem berdi. Munyń barlyǵy – búgingi qıyn kezeńde úlken kómek.
Memleket basshysy Assambleıa budan ári de qaıyrymdylyq is-sharalaryna belsendi qatysý qajettigin aıtty. Parlament jáne máslıhat depýtattarymen qarym-qatynasyn nyǵaıtyp, tyǵyz jumys isteýdi tapsyrdy. Búginde Assambleıa quramynda Senattyń ta, Májilistiń de depýtattary bar. Olardyń birqatary – elge tanymal qoǵam qaıratkeri. Osy depýtattardyń, sondaı-aq «Aqsaqaldar keńesi» men «Analar keńesiniń» is-áreketin úılestirip, qoǵamda kóptegen isti júzege asyrýǵa bolatyndyǵyn kórip otyrmyz jáne soǵan senemiz.
Sessııanyń maqsaty – birlikti, jasampazdyqty nyǵaıtý jáne sol arqyly Ulttyq quryltaıda atap ótken qundylyqtardy ári qaraı damytyp, elimizdiń órkendeýine, órleýine úles qosý.
Prezıdent Assambleıanyń keshegi basqosýynda «Aqsaqaldar keńesi» jáne «Analar keńesi» sekildi tıimdi qurylymdardy odan ári nyǵaıtýdy tapsyrdy. Oǵan qosa Jastar Assambleıasyna da erekshe kóńil bólip, onyń da jumysyn ilgeriletýdi júktedi. Halyqty birlikke, qıyndyqty birlese eńserýge shaqyrdy.
Damır BELGIBAEV,
Qazaqstan qoǵamdyq damý ınstıtýty sarapshysy