Aqyndar men batyrlar eli – Jambyl aýdany turǵyndarymen kezdesken Almaty oblysynyń ákimi Marat Sultanǵazıev «Taza Qazaqstan» jalpyulttyq ekologııalyq aksııasy aıasynda uıymdastyrylǵan «О́z aǵashyńdy ósir» atty ıgi sharaǵa qatysty, dep habarlaıdy Egemen.kz.
Sapar barysynda aýdandaǵy birqatar áleýmettik nysandardy aralaǵan óńir basshysy Uzynaǵash aýylyndaǵy №1 mektep-lıseıge arnaıy atbasyn buryp, mektep oqýshylarymen birge aǵash kóshetterin otyrǵyzyp, kópke úlgi boldy.
«Búgin «Jasyl aımaq» baǵyty boıynsha mektep oqýshylary men ujymdarynyń bastamasymen óńirimizde «О́z aǵashyńdy ósir» atty tuqymnan aǵashty otyrǵyzý aksııasy uıymdastyrylyp otyr. Oǵan bilim ordalaryndaǵy 340 myńnan astam oqýshynyń bir kisideı qatysýy onyń jalpy buqaralyq sıpatyn kórsetip otyr. Osy arqyly biz Prezıdentimizdiń orman alqabynda 2 mıllıard, eldi mekenderde 15 mıllıon aǵash otyrǵyzý boıynsha tapsyrmasyn oryndaýǵa óz úlesimizdi qosyp otyrmyz. Bul aksııanyń tárbıelik máni óte joǵary. Atqarylǵan jumystar týyp-ósken jerimizdi, óz ólkemizdi kógaldandyrýmen qatar, jasyl jelekke oraýǵa múmkindik beredi. Buǵan qosa mundaı ıgi is-sharalar bizdiń aýyzbirshiligimizdi aıqyndap, eldigimizdi kórseteri anyq. Endeshe, bul iske atsalysqan jerlesterimiz ben búldirshinderimizge alǵysymdy bildiremin», dedi Marat Eleýsizuly.
Osy kúni oblys ortalyǵy – Qonaev qalasynda «Jasyl aımaq» aksııasy aıasynda 14 mektepten 13000 oqýshy bir mezette aǵash tuqymyn egý rásimine belsendi túrde qatysqanyn aıta ketý artyq etpes.
Jalpy «Jasyl aımaq» aptalyǵynda qala boıynsha 1 500 túp jasyl jelek otyrǵyzý josparlanǵan.
Almaty oblysy