Qalyń qazaqqa «Alakóldiń Atymtaı Jomarty» atanǵan belgili kásipker Baýyrjan Ospanovtyń arqasynda alǵash ret shalǵaıdaǵy eldi mekende daryndy balalarǵa arnalǵan jaratylystaný baǵytyndǵy pánderdi tereńdetip oqytatyn lıseı-mektebi ashylǵan bolatyn. Almaty oblysy Alakól aýdanyndaǵy Jylandy aýylyndaǵy bul mektep qazir mesenat azamattyń arqasynda zaman talabyna saı, talapty balalarǵa jaqsy bilim berýde. Jylandy aýylynyń búgingi tirligi qaladaǵylardan kem emes.
Eldi mekenniń syrtqy kelbeti ǵana sándi emes, ishi de mándi. Mádenıet saraıy, sport mektebi jáne turǵyndar men jastarǵa qajetti basqa da áleýmettik-mádenı nysandary bar. Kúni keshe ǵana táı-táı basyp, tusaýyn kesken Jylandy mektebiniń oqýshylary kúzgi demalys kezindegi aýdanaralyq jarysta joǵarǵy jetistikke qol jetkizip, birinshi oryndy ıemdendi.
Aıtqandaı, osy Jylandy aýylyna qonaqqa kelgen Almaty qalasynyń №178 lıseıiniń oqýshysy Aıajan Talǵat óz bilimin synap kórý maqsatynda jarysqa qonaq retinde qatysyp eń joǵary upaı jınap erekshe iltıpatqa ıe boldy. Aıajan Talǵatty jaratylystaný baǵytyndaǵy pánder boıynsha kórsetken joǵarǵy nátıjesi úshin Alakól aýdandyq ákimdigi Alǵys hatpen marapattady.
Almatydan barǵan Aıajan Talǵattyń osy jolǵy oljasy jaıdan-jaı emes. Jeńimpaz bala bilim alyp júrgen Almaty qalasyndaǵy fızıka-matematıka pánderin tereńdete oqytatyn №178 lıseı – jaqsy jetistikterimen maqtalyp júrgen bilim ordasy. Respýblıkalyq baıqaýlarda, ǵylymı jobalardyń jarystarynda, túrli mádenı sharalarda aldyńǵy qatardan tabylyp júrgen qaladaǵy mańdaıaldy bilim mekemeleriniń biri. О́tken oqý jylynda osy bilim uıasyn bitirgen 109 túlektiń ishinde 22 halyqaralyq ǵylymı jobalar jarystarynyń, halyqaralyq konkýrstardyń qatysýshylary men jeńimpazdary, 22 «Altyn belgi» ıegeri, 15 erekshe úlgidegi attestat ıegerleri ózderine artqan senimdi aqtaı bildi.
Sońǵy oqý jylynda búkil respýblıka boıynsha birinshi bolyp eń joǵary ball jınaǵan da osy mekteptiń túlegi Aıǵanym Ábdijapar 125 ball jınap, mektebiniń de, ata-anasynyń da, ustazdarynyń da mereıin tasytqan edi. Aıajan Talǵat ta qazir mekteptegi «Altyn belgiden» úmitker oqýshylardyń biri. Ol óziniń shyǵarmashyl, ushqyr oıly jáne eń bastysy, óz bilimin iske asyratyn tulǵa – daryndy oqýshy ekenin dáleldedi.
Aınash ESALI,
«Egemen Qazaqstan».
ALMATY.