Rýdnyı qalasyndaǵy «MedıDez» ǵylymı-óndiristik birlestigi joǵary sapaly dezınfeksııa, antıseptık quraldary men sabyn túrlerin shyǵarady. Sońǵy jyldary kompanııa ónimine suranys artqan soń óndiris kólemi de ulǵaıa túsken. 2023 jyly Prezıdenttiń «Altyn sapa» syılyǵyn jeńip alǵan otandyq óndiris búginde mıkrob joıǵysh sabyndar men terini jáne medısınalyq qural-jabdyqtardy zararsyzdandyratyn hımııalyq ónim túrlerin kóptep shyǵara bastady.
Aýrýhana gıgıenasy salasyna mamandanǵan kompanııa túrli emdeý-profılaktıkalyq mekemelerdegi ınfeksııa qaýipsizdigin qamtamasyz etip keledi. Otandyq ónim qarapaıym tutynýshylardyń kúndelikti turmystyq qajetine jaraýmen qatar, densaýlyq saqtaý mekemeleri men ashana, meıramhana tárizdi kópshilikti tamaqtandyrý oryndarynyń da suranysyn ótep berip otyr.
«Qazir dezınfeksııalyq ónim shyǵaratyn kásiporyndardyń kóbeıip ketkeni ras. Olar shyǵaratyn ónimderdiń paıdalanylý aıasy, ataýy shamalas bolǵanymen quramy, sapasy, qospalary ártúrli. Máselen, dáriger táýligine keminde 30-40 ret qol jýady delik, eger emdeý mekemesindegi dezınfeksııalyq suıyqtyq sapasyz bolsa, qol qandaı kúıge túser edi? Sol sebepti biz sapaly shıkizat qoldanamyz. Árıne, bizdiń ónimdi aıtarlyqtaı arzan dep aıta almaımyn. О́ıtkeni shıkizatty eýropadan aldyramyz. Tutynýshylarymyzdy baǵa emes, sapa qyzyqtyrady», deıdi ǵylymı-óndiristik birlestiktiń dırektory Álııa Qaıraqbaeva.
Kásiporyn keıingi bes jyldan beri óz ónimderiniń biraz bóligin Qyrǵyzstanǵa eksporttaıdy. Qazir Reseıge de taýar jóneltip jatyr. Kompanııa basshylarynyń aıtýynsha, Reseı naryǵyna ónim jóneltýdiń birtalaı qıyndyqtary bar, óıtkeni ol jaqta saýda básekesi joǵary. Alaıda soǵan qaramastan «MedıDezdiń» antıseptıkteri Tver, Ekaterınbýrg, Samara, Cheboksary qalalarynda satylyp jatyr.
Ǵylymı-óndiristik birlestiktiń tarıhy 2014 jyldan bastaý alady. Ol kezde kásiporynda nebári úsh-aq adam jumys isteıtin, qazir 50-den asa qyzmetker turaqty túrde eńbek etedi. Zaýyt ónimderin búginde elimizdiń barlyq óńirlerinen kezdestirýge bolady.
«Oblystan tys óńirlerge aptasyna bir ret, keıde eki reti aýyr júk kólikterimen, kún saıyn «Gazel» kólikterimen taýar jiberip otyramyz. Bes jyldan beri osy jerde jumys istep jatyrmyn. Tapsyrys kún saıyn túsip jatady. Elimizdiń barlyq óńirinde ózimizdiń senimdi seriktesterimiz bar», deıdi zaýyttyń daıyn ónimder qoımasynyń meńgerýshisi Baqytjamal Birnazarova.
Kásiporyn halyqaralyq ISO 9001 standarty men HASSP júıesine saı sertıfıkattalǵan. Sondyqtan zaýyttan shyǵatyn búkil ónim arnaıy synaq zerthanasy arqyly baqylanyp otyrady. Synaq zerthanasynyń basshysy Elena Vasılkovanyń aıtýynsha, shıkizat óndiriske jiberilmes buryn jan-jaqty tekseriledi.
«Odan keıin jartylaı fabrıkattar men daıyn ónimdi tekseremiz. О́nimniń ár leginen arbıtrajdyq úlgi alyp qalamyz da, sol boıynsha jáne belgilengen jaramdylyq merzimi boıynsha ónim sapasyn baqylap otyramyz. Bizdiń zerthanamyz akkredıtasııadan ótken. Sondyqtan Ulttyq saraptama ortalyǵy josparly túrde ınspeksııalyq tekseris júrgizip otyrady. Men bul zaýytta bes jyl jumys istep jatyrmyn. Bári unaıdy. Ujymymyz óte jaqsy. Basshylyq ta únemi qoldaý kórsetip otyrady», deıdi synaq zerthanasynyń basshysy.
Zaýyt kásipkerlikti memlekettik qoldaý tetikterin de tıimdi paıdalanyp otyr. Máselen, 2020 jyly qymbat qurylǵylar satyp alyp, óndiris aýqymyn keńeıtip, qarjy aınalymyn ulǵaıtý úshin kompanııa «Alfa Bank» AQ arqyly 14,5%-dyq nesıe alǵan. Kásiporynnyń kepildikke qoıatyn basy bos ǵımaraty bolmaǵandyqtan «Damý» qory nesıeniń jartysyna kepildik berdi. Paıyzdyq mólsherlemeniń bir bóligi «Bıznestiń jol kartasy – 2025» baǵdarlamasy aıasynda memleket tarapynan sýbsıdııalandy. Osylaısha, kompanııa ózi alǵan qomaqty nesıeni qysqa merzim ishinde 6%-dyq jyldyq syıaqymen ótep shyqty.
«Preparattar óndirisine qajet shıkizatty Amerıka men Eýropanyń irgeli ónerkásip oryndarynan aldyrtamyz. Dezınfeksııa quraldaryn óndirýge paıdalanylatyn sý kópsatyly tazartýdan, sondaı-aq keri osmos ádisi arqyly óńdeýden ótedi. Mundaı sýdy, tipti dári-dármek jasaý úshin de paıdalanýǵa bolady. Mindetim – shıkizattyń kiris baqylaýynan bastap daıyn ónimniń shyǵýyna deıingi barlyq tehnologııalyq úderisti tolyq baqylaýda ustap otyramyn. Munda mamandardyń kásibı sheberligin arttyrý máselesi de jaqsy jolǵa qoıylǵan. Mysaly, jyl saıyn Máskeýden bıznes-jattyqtyrýshylar kelip, paıdaly trenıngter ótkizip turady», deıdi zaýyt tehnologi Dına Muhambetova.
Kásiporyn birtalaı jyldan beri óńirdegi qaıyrymdylyq sharalaryna atsalysyp turady. Sonymen qatar «Balalarǵa ómir syıla» jobasy aıasynda sırek kezdesetin ári kúrdeli otany qajet etetin aýyr naýqasy bar balalardyń shetelde emdelýi úshin zaýyttan «Baladez» serııasymen shyǵarylatyn dezınfeksııalyq quraldan túsken qarjyny tolyǵymen «Qaıyrymdylyq» erikti qoǵamynyń esebine aýdaryp otyrady.
«MedıDez» ǵylymı-óndiristik birlestigi aldaǵy ýaqytta ónimderin Mońǵolııa naryǵyna shyǵarýdy kózdeıdi. Sonymen qatar óndiriske bes birdeı jańa ónimin engizeıin dep otyr. Onyń bireýi – qol súrtýge arnalǵan antıseptık. Qalǵany qural-jabdyqtardyń syrtyn súrtetin dezınfekııalyq suıyqtyq.
Qostanaı oblysy