Naýryznama onkúndigi aıasyndaǵy Shańyraq kúni – otbasy qundylyqtaryn ulyqtap, urpaq sabaqtastyǵyn dáripteıtin taǵylymdy kún. Qazaq uǵymynda shańyraq – tek bir áýlettiń emes, tutas ulttyń tutastyǵyn tanytatyn kıeli nyshan. Otbasynyń beriktigi – qoǵamnyń beriktigi, al urpaq jalǵastyǵy – el bolashaǵynyń kepili.
Memleket basshysy Qasym-Jomart Toqaev otbasy ınstıtýtynyń strategııalyq mánine aıryqsha toqtalyp, onyń ult sapasyn aıqyndaıtyn basty tirek ekenin atap ótken edi.
«Otbasy ınstıtýty eńbekqorlyq, bilimpazdyq, tilektestik syndy «Adal azamatqa» tán qasıetterdi qoǵamda jan-jaqty dáripteý arqyly ulttyń jańa sapasyn qalyptastyrýǵa ólsheýsiz úles qosady. Berekeli shańyraq – elimizdi úılesimdi ári ornyqty damytýdyń myzǵymas kepili. Sondyqtan memleket ana men balany qorǵaý júıesin jetildirýge, otbasy qundylyqtaryn ulyqtaýǵa basa mán beredi. Ár otbasynyń ál-aýqatyn jaqsartý – Ádiletti Qazaqstandy qurý jolyndaǵy negizgi mindettiń biri», degen bolatyn.
Osyndaı ulaǵatty ustanymdardyń naqty kórinisin eńbekpen órilgen áýletterdiń taǵylymdy jolynan ańǵarýǵa bolady. Solardyń biri – Muhatovtar áýleti. El ıgiligi jolynda tutas áýletimen qyzmet etip kele jatqan bul otbasynyń ónegesi kópke úlgi. Úsh urpaqtyń mańdaı teri toǵysqan áýlet sý sharýashylyǵy salasyna 160 jyl ǵumyryn arnaǵan.
Shańyraq kúni: Búgin elordada qandaı is-sharalar ótedi?
Bul áýlettiń eńbek joly 1967 jyldan bastaý alady. Sodan beri birneshe býyn ókilderi eldiń sý qaýipsizdigin qamtamasyz etý isine qaltqysyz qyzmet etip keledi. Búginde sol dástúrdi jalǵastyryp júrgenderdiń biri – «Qazsýshar» RMK Aqmola fılıalynda jetekshi maman qyzmetin atqaratyn Janar Muhatova. Ol sý tutynýshylarmen jumys júrgizip, gıdrotehnıkalyq nysandardyń tehnıkalyq jaǵdaıyn baqylap, júıeli tekserýler uıymdastyrady.
Shańyraqtyń shyraǵy, ulttyń uıytqysy
Janardyń kásibı joly – áke-sheshesiniń ónegesiniń zańdy jalǵasy. Ákesi Jumabek Muhatov sý sharýashylyǵy salasynda uzaq jyl eńbek etip, sheberden bastap basshylyq qyzmetterge deıin kóterilgen. Ol Jambyl oblysynyń sý júıesin damytýǵa súbeli úles qosyp, 2011-2017 jyldary Shý-Talas basseındik sý ınspeksııasyn basqardy. Al anasy Ázııa Shamshıeva bul salada 40 jyldan astam eńbek etip, Shý, Talas, Asa ózenderiniń sýyn bólýdi, sý qoımalarynyń esebin júrgizýdi úlken jaýapkershilikpen atqardy. Keıin Sý resýrstary komıtetinde qyzmet etti.
Áýlettiń eńbek sabaqtastyǵy budan da tereńde jatyr. Janardyń naǵashy atasy men ájesi Ádilshe jáne Aıbalash Shamshıevter Jambyl oblysy Jýaly aýdanyndaǵy sý sharýashylyǵy nysandarynda uzaq jyl eńbek etken. Al ápkesi Gúlmıra da osy saladan alshaq ketken joq – «Qazsýshar» mekemesinde ınjener-gıdrotehnık ári ekonomıst qyzmetin atqarǵan.
«Jumysqa qatysty máseleler boıynsha anammen jıi aqyldasamyn. Tájirıbeli mamannyń keńesi qajet bolǵanda eń aldymen soǵan júginemin. О́zara qoldaý kórsetý jáne kez kelgen sátte kómektesýge daıyn bolý – bizdiń otbasymyzdyń basty qundylyqtarynyń biri. Ata-anamnyń ónegesi óz jolymdy tabýyma kómektesti, al olardyń tárbıesi el ıgiligi úshin aıanbaı eńbek etýge jiger beredi», deıdi Janar Muhatova.
Búginde Sý resýrstary jáne ırrıgasııa mınıstrligine qarasty «Qazsýshar» kásipornynda osyndaı 60-tan astam eńbek áýleti bar. Solardyń qatarynda Muhatovtar – Shamshıevter áýleti – urpaq sabaqtastyǵy men adal eńbek dástúriniń aıqyn úlgisi.
Yrys uıalaǵan shańyraq
Shańyraq – tek otbasynyń uıytqysy ǵana emes, tutas qoǵamnyń tiregi. Osyndaı eńbekpen órilgen áýletter eldiń irgesin bekemdep, ulttyń sapasyn arttyrýǵa únsiz, biraq ólsheýsiz úles qosyp keledi.