BAQ salasyndaǵy Prezıdent syılyǵynyń tuńǵysh laýreaty, Qazaqstannyń eńbek sińirgen qaıratkeri, el gazeti «Egemen Qazaqstan»-dy basqarǵan Erjuman Smaıyl turǵan úıdiń qabyrǵasyna (Astana qalasyndaǵy «Samal» shaǵyn aýdany) eskertkish-taqta ilindi. Jýrnalıster qaýymy Eraǵa atap ketken Erjuman Smaıyldyń ult jýrnalıstıkasyndaǵy orny bólek-tuǵyn.
Saltanatty is-sharaǵa Qazaqstan Prezıdentiniń keńesshisi Baýyrjan Omarov, Parlament Senatynyń depýtaty Nurtóre Júsip, memleket jáne qoǵam qaıratkeri Saýytbek Abdrahmanov, «Egemen Qazaqstan» gazetiniń ujymy, ardager jýrnalıster, Erjuman Smaıyldyń otbasy, týǵan-týystary qatysty.
Eskertkish taqtanyń ashylý saltanatynda Saýytbek Abdrahmanov sóz sóılep, zamandas áriptesi týraly estelikterin tebirene jetkizdi.
«Erjuman aǵamyz «gazetchık» uǵymyn joǵary bıikke kótergen adam. Sol arqyly mamandyqtyń mártebesin asyrdy. Ol prozaǵa da barǵan joq, basqa janrlarǵa da qyzyqqan joq, tipti Erekeńniń alǵashqy kitaby jasy elýden asqanda jaryq kórdi. Sonda da Eraǵa erekshe qurmettiń ıesi boldy. Uıymdastyrýshylyq talantymen, ózgege bolsyn degen ózgeshe jomart júregimen, jastarǵa degen qamqorlyǵymen kózge tústi. Bar ómirin jýrnalıstıkaǵa, gazettiń qara jumysyna arnaýmen ótti. Sóıte júrip BAQ salasynadaǵy Prezıdent syılyǵynyń tuńǵysh laýreaty atandy», dedi S.Abdrahmanov.
Al jampoz jýrnalıst Jarylqap Beısenbaıuly jastar gazeti «Lenınshil jasqa» qatar kelgenderin, Erjuman Smaıyldyń kele sala óziniń uıymdastyrýshylyq qabiletimen, iskerligimen erekshelengenin jetkizdi.
«Lenınshil jastaǵy» myqty aýdarmashylar baspa salasyna aýysyp ketken kez edi. Erjuman kele salyp birden aýdarma isin alyp ketti. Tipti mátindi birden «dıktovka» jasaı otyryp aýdaryp tastaıtyn. Sharshamaıtyn, talmaıtyn Erjuman «Egemende» de qara jumysty atqarýshy edi. Túnimen kezekshilikte bolsa da, tańerteń jumysta otyratyn. Biz soǵan tańǵalatynbyz», dedi J.Beısenbaıuly.
Senat depýtaty Nurtóre Júsip Erjuman Smaıyldyń óte saýatty redaktor bolǵanyna toqtaldy.
«Erekeńdi qazaqtyń sózin, búkil maqal-máteli men frazeologııalyq tirkesterdiń barlyǵynyń qalaı saqtalýyn gazet arqyly qalyń qazaqqa jetkizip otyrǵan til zergeri dep aıtýǵa bolady. Adamdyq qyryna keletin bolsaq, bir sózben aıtqanda Erjuman aǵa «Egemen Qazaqstan» deıtin qadirli de qasterli qarashańyraqtyń quty boldy», degen N.Júsip.
E.Smaıyldyń basshy men tilshini qatar qabyldaıtyn qarapaıymdylyǵyn, qaı iste bolsyn elgezektik tanytyp uıymdastyrý jumysynyń basy-qasynda júretinin aıryqsha atap ótti.
«Egemen Qazaqstan» gazetiniń bas redaktory Ǵabıt Iskenderuly Erjuman Smaıyldyń minezdi adam bolǵanyn, sol mineziniń arqasynda elge qadirli bolǵanyn aıtyp ótti.
«Sherhan Murtazanyń 60 jyldyq mereıtoıynda qazaq jýrnalıstıkasynyń korıfeıi Kamal Smaıylov «Basylym bastyǵyna tartady» dep jazǵan edi. Sol sııaqty «Egemen Qazaqstan» basylymy Eraǵa basqarǵan jyldary minezdiligimen halqyna jaqty, jaqyn boldy. Eger ol kezde Eraǵada minez bolmasa gazettiń bolmysy da basqasha bolar ma edi. Sondyqtan osyndaı minezdi aǵamyzǵa, elge, qazaq jýrnalıstıkasyna eńbegi sińgen Eraǵaǵa osyndaı qurmet kórsetýdi zańdylyq dep esepteımin», dedi Ǵ.Iskenderuly.
Qabyrǵadaǵy taqta betin jaýyp turǵan aq shúberekti senator Nurtóre Júsip pen qoǵam qaıratkeri S.Abdrahmanov túrdi. Jınalǵan kópshilik qara mármárǵa qashalǵan Erjuman О́teshulynyń áppaq beınesine uzaq qarap, kóńili bir marqaıyp qaldy.