Premer-mınıstrdiń baspasóz qyzmeti Almatyda 1 maýsymǵa deıin jer silkinisi týraly habarlaý júıesin pılottyq rejımde engizý josparlanyp otyrǵanyn málimdedi, dep habarlaıdy Egemen.kz.
- Tótenshe jaǵdaı týyndaǵan kezde azamattardy ýaqtyly habardar etý úshin bıyl 1 maýsymǵa deıin "Jappaı dabyl" júıesi pılottyq rejımde engiziledi, – delingen habarlamada.
Premer-mınıstrdiń orynbasary Qanat Bozymbaev Almatyda seısmıkalyq qaýipsizdikti qamtamasyz etý máseleleri boıynsha keńes ótkizdi.
- Ǵımarattardyń seısmıkalyq tózimdiligin arttyrý boıynsha qabyldanyp jatqan sharalar týraly ındýstrııa jáne qurylys mınıstri Qanat Sharlapaev baıandady. Ol seısmıkalyq deńgeıi 7-9 ball bolatyn ýchaskelerde turǵyn úıler men áleýmettik nysandar salý úshin mindetti seısmıkalyq oqshaýlaý júıesin engizý týraly baıandady. Normatıvtik-tehnıkalyq qujattarǵa tıisti túzetýler daıyndaldy, – dedi baspasóz qyzmeti.
Bozymbaev halyqaralyq, sonyń ishinde japondyq tájirıbeni eskere otyryp, jer silkinisi qaýpi bar aımaqtardaǵy nysandardy jobalaý standarttaryn qataıtý boıynsha jumystardy júrgizýdi, akkredıttelgen zerthanalardy paıdalana otyryp, qurylys normalarynyń saqtalýyna qadaǵalaýdy kúsheıtýdi tapsyrdy.
- Halyqty habardar etý jelige qosymsha júktemeni týdyrmaıtyn jáne bazalyq stansııa antennalarynyń qamtý aımaǵyndaǵy barlyq abonentterdi dereý jáne jappaı habardar etýge múmkindik beretin Cell Broadcast tehnologııasy arqyly júzege asyrylady, – dedi Almaty ákimi Erbolat Dosaev.
Vıse-premer halyqty tótenshe jaǵdaı týraly habarlaý júıesin engizý úderisin jedeldetýdi tapsyrdy. Bul júıe elimizdiń jer silkinisi qaýpi bar barlyq aımaqtarynda bolýy jáne úzdiksiz jumys isteýi kerek.
- Sonymen qatar Qanat Bozymbaev memlekettik organdardyń jer silkinisi kezindegi áreket algorıtmin de tyńdady. Bul halyqty aqparattandyrýǵa, qutqarý jáne evakýasııalaý sharalaryn uıymdastyrýǵa, dalalyq jáne jyljymaly aýrýhanalardy ornalastyrýǵa qatysty. Vıse-premer Tótenshe jaǵdaılar mınıstrligine maýsym aıynyń birinshi onkúndiginde "Jer" respýblıkalyq oqý-jattyǵýy kezinde algorıtmdi synaqtan ótkizýdi tapsyrdy, – dep tolyqtyrdy mınıstrler kabıneti.
- Jattyǵý aıasynda tartylǵan tehnıkanyń jaı-kúıin jáne onyń sheshiletin mindetterge sáıkestigin tekserý de mańyzdy. Bul rette tótenshe jaǵdaılardy joıýǵa jeke uıymdardyń tehnıkasyn tartý máselesin pysyqtaý qajet, – dedi Bozymbaev.
Úkimette túsindirgendeı, otyrys qorytyndysy boıynsha tıisti mınıstrlikterge eldegi seısmıkalyq jaǵdaıǵa turaqty monıtorıngti qamtamasyz etý jáne jer silkinisi kezinde turǵyndardyń is-áreketterin tájirıbe júzinde júzege asyrý boıynsha oqý-jattyǵýlardy júıeli túrde ótkizý tapsyryldy.