Alysta júrgen adamǵa atamekennen ystyq jer bolmaıtyny aıtpasa da túsinikti. Biz basynda Qaraqalpaqstanda turyp jattyq. Elimiz egemendik alǵan soń-aq, ata-anam Edil Áıtimbetov pen Qarlyǵa Ábdiǵalıeva atamekenge qonys aýdarýǵa qamdandy. Sóıtip, tórt balasymen 2004 jyly ata-babalarynyń kindik qany tamǵan Aqtóbe óńirine atbasyn buryp, Muǵaljar aýdanynyń Aqkemer aýylyna taban tiredik. Kvota boıynsha bólingen qarjyǵa úı satyp alyp, «kóppen kórgen uly toı» degendeı, tirshilikke aralasyp, elden qalmaýǵa talpyndyq.
Men oblys ortalyǵyndaǵy «Raýan» kolledjin keden isi mamandyǵy boıynsha bitirgennen keıin eki jyldaı «IMK Sekıýrtı» JShS-inde kúzetshi bolyp jumys istedim. Arasynda oblys ortalyǵyndaǵy jıhaz jınaý sehynda jumys istep, aǵash sheberligine de tóselip aldym. Sóıtip, jıhaz jasaýdyń qyr-syryn da ıgerdim. Bireýge táýeldi bolǵansha aýylǵa baryp, óz isimdi nege ashpasqa degen oı keldi qaperime. Nartáýekel dep 2007 jyly sáýir aıynda «Áıtimbetova.Ǵ.E.» jeke kásiporynyn ashyp, tirkeýden ótkizdim. «Oqý oıdan artyq emes» degendeı, osylaı jıhaz jasaýǵa kirisip kettim. Qural-jabdyǵymdy túgendep, qajetti materıaldy Aqtóbe qalasynan jetkizýge týra keldi. Ol úshin árıne, kólik kerek boldy. BTA banki oblystyq fılıalynan 600 myń teńge nesıe alyp, jıhaz qurastyrý stanogyn, qorapty «GAZel» avtokóligin satyp aldym. Jıhazdy basynda yńǵaılastyrylǵan oryndarda jınadym. О́z qolymnan shyqqan jıhazǵa tapsyrys kóbeıe túskenin ańǵarǵan soń arnaıy seh salýdy oılastyrdym. «Qulannyń qasýyna, myltyqtyń basýy» degendeı, osy kezde Muǵaljar óńirinde qara altyn óndirýmen aınalysatyn Reseıdiń «Lýkoıl» kompanııasy osy óńirdegi aýyldarda óz isin ashýǵa úmitkerlerge «Araı» arnaýly baǵdarlamasyn júzege asyrýǵa kiristi. Bir ereksheligi, bul baǵdarlama boıynsha bólinetin grant ótemsiz tegin beriletin edi. О́z bıznes-jobamdy jasap, grantqa iliktim. Grant boıynsha qolyma tıgen 1 mıllıon teńgege táp-táýir jıhaz jınaý sehyn salyp aldym. Bizdiń sehta jınalǵan jıhazdardyń dúkenderdegiden artyq bolmasa, kem túspeıtinin ańǵarǵan aýyldastarym at sabyltyp Aqtóbege baryp, jıhaz ákelýdi qoıdy. Osynda tapsyrys berip, kireberiske, as úıge qoıatyn jıhazdardy, kompıýter ústeli jáne basqa jıhazdardy jaqyn jerden úılerine kirgize qoıýǵa daǵdylandy. Kórshi aýyldardan da kelip, alyp jatady. Bir sózben aıtqanda, isim júrdi, endi óndiristi keńeıtýge týra keldi. «Jumyspen qamtý-2020» baǵdarlamasy boıynsha «Bıznes-Navıgator» kásipkerlik ortalyǵynda bilimimdi kóterip, arnaıy kýrstan óttim. Oqýy, jatar orny men jolyn Úkimet kóterdi. Qolyma arnaıy sertıfıkatpen birge, osy baǵdarlamanyń ekinshi baǵyty boıynsha 1 mıllıon teńge nesıesi de tıdi. Bul qarjyǵa qosymsha materıal satyp alyp, óndirisimdi keńeıttim. Qazir osy shaǵyn jıhaz sehynda ózim men inim Nurymnan basqa aýyldastarym – Kenen Baısultanov, Jańalyq Aımaǵambetov eńbek etedi. Aılyqtarymyz da jaman emes, 40-50 myńnan aınalady.
Qashanda jańadan is bastaý ońaı emes. Men bul sharýaǵa on oılanyp, myń tolǵanyp baryp kiristim. Sondaı-aq, maǵan ata-anam, baýyrlarymnyń qoldaý kórsetýi de kúsh berdi. Elbasy Nursultan Nazarbaevtyń áleýmettik baǵdar ustanǵan sara saıasatynyń arqasynda qolǵa alǵan isimizde bereket taptyq desem artyq aıtqandyq bolmas. Kásipkerlikti, sonyń ishinde, aýylda shaǵyn jáne orta bıznesti damytýǵa baǵyttalǵan baǵdarlamalardyń tıimdiligi sózsiz. Mundaı múmkindikti jalqaý, enjar adam ǵana paıdalanbaıdy. «Qolymyzǵa qarmaq berdi» ǵoı, endi sonyń ıgiligin kórý árkimniń óz ynta-yqylasyna baılanysty. Biz kóptegen turmysqa qajetti jıhazdardy qurastyryp, shyǵarýdy jolǵa qoıdyq. Bizdiń jıhazdarymyz fırmalyq ónimderden kem túspeıdi, esesine arzan, tasymalǵa da shyǵyndanyp jatpaıdy. Sondyqtan bolar suranys joǵary, onyń ústine biz tutynýshynyń tapsyrysy boıynsha ózderiniń talǵamyna saı etip daıyndaımyz. Jıhazdardy sol úıdiń alańyna saı keletindeı etip, tutynýshymen kelise otyryp jasaımyz. Bul da tutynýshylar kóńilinen shyǵyp tur.
Qazir bankten alǵan nesıelerimdi birtindep qaıtara bastadym. Bolashaqta dıvan, kreslo sııaqty jumsaq jıhaz shyǵarýdy da oılastyrýdamyn.
Ǵalym ÁITIMBETOV,
kásipker.
Aqtóbe oblysy,
Muǵaljar aýdany.