Venera Ardashevanyń bul kásipke kelýine Aqtóbe oblysy kásipkerler palatasy mamandarynyń yqpaly zor. Sebebi bala kútimimen úıde otyrǵan qarapaıym ana osydan birneshe jyl buryn elimizde «Bastaý-Bıznes» baǵdarlamasy týraly estip, mán-jaıdy bilý úshin palataǵa keledi. Osy kezden bastap bıznestegi barlyq qadamdaryn «Atamekenmen» birge júzege asyryp kele jatyr, dep habarlaıdy Egemen.kz.
Aqtóbe qalasynyń turǵyny Venera Ardasheva − kópbalaly ana. Búginde óz qarajatyna oqý ortalyǵyn ashqan ol aldaǵy ýaqytta «Damý» kásipkerlikti damytý qory arqyly bıznesin keńeıtýdi josparlaıdy. Qaıda júginý kerek jáne qandaı qujattar paketi qajet degen saýaldarǵa jaýap alý úshin birinshi kezekte Kásipkerlerge qyzmet kórsetý ortalyǵynda keńes berildi. «2020 jyly kásipkerler palatasynda «Bastaý-Bıznes» baǵdarlamasy jaıynda mol maǵlumat aldym. Bıznes bastaý úshin táýekelge barý kerektigin túsindim. Esep-qısap, bıznes-joba qurý, marketıngtik taldaýǵa basymdyq berý — bıznes ashýdaǵy alǵashqy qadamdar. Sondyqtan 2021-2022 jyldardy osy baǵytta oqýǵa arnadym», deıdi Venera. Búginde Aqtóbe qalasynyń kóne bóliginde «Kel, Balalar» oqý ortalyǵyn ashqan kásipker bul kásiptiń qoǵamǵa qanshalyqty qajet ekenin bilý maqsatynda kóp izdenip, taldaý júrgizgen. Bul iste oǵan joldasy erekshe qoldaý tanytypty. «Bastaýysh synyp muǵalimi mamandyǵy boıynsha bilim alyp jatyrmyn. Bıyl dıplom alamyn. Tuńǵyshymyzdyń jasy — 14-te, al kenjemiz — úsh aılyq. Alaıda kópbalaly ana retinde úıde qol qýsyryp otyrǵandy jón kórmeı, bir nársemen aınalysý kerektigin túsindim. Oılana kele, oqý ortalyǵyn ashýǵa bekindim. Sebebi balamen jumys istegendi jaqsy kóremin ári mamandyǵym da osy iske kelińkireıdi. Ortalyq ashý týraly oıymdy joldasym da quptady. Ol vahtalyq ádispen jumys isteıdi. Sóıtip, onyń demalysynda ekeýlep oqý ortalyǵyn qalanyń qaı bóliginen ashýdy uzaq oılastyryp, taldaý júrgizýge kiristik», dep bólisti Venera Ardasheva. Onyń aıtýynsha, ortalyqqa suranys bolý kerek.
«Eger suranys bolmasa, onda bıznesiń qurdymǵa ketedi. Aqtóbe qalasynyń Eset batyr turǵyn alabynda turatyndyqtan, áýeli osy mańnan ashýdy kózdedik, biraq mundaǵy 4-aýdanda mundaı ortalyqtyń baryna kóz jetkizdim. Qurmysh aýdanyna mundaı ortalyqtyń qajet ekenin osy aýdanda kóshe boıy turǵyndarǵa júrgizgen saýalnamam men taldaýymnyń arqasynda jaqsy túsindim», deıdi ortalyq jetekshisi. Qazir Venera bir ǵımarattyń úsh bólmesin jalǵa alyp otyr. Eki aýysymda júzge tarta balany oqytýǵa jaǵdaı jasaýǵa kirisken. Ol úshin kásipker óz qarajatyna jańa partalar men oryndyqtar, oqýǵa, kórnekilikke qajetti qural-jabdyqtar satyp alypty. Jumysty bıyl sáýirde bastap ketti. Qazir jıyrmaǵa tarta balaǵa dáris berip jatyr. 5 adamdy turaqty jumyspen qamtyp otyr. Onyń biri logoped maman bolsa, ekeýi — basaýysh synyp muǵalimderi. Qazir ortalyqta jazǵy lagerge bala qabyldanyp jatyr.
«Ortalyq ashýda Aqtóbe oblystyq palatasy tarapynan júrgizilgen semınar, trenıngter kóp paıdasyn berdi. Osyndaı is-sharalarǵa qatysýdyń nátıjesinde kóptegen adamdarmen tanysyp, kásipkerlermen jaqyn aralasa bastadym. Úıde otyrǵan qarapaıym anadan ortalyq jetekshisi bolýǵa deıingi aralyqta kóp eńbektenýime týra keldi. Ásirese býhgalterlik esepterdi júrgizý úshin palatadan tegin keńes alýdyń arqasynda osyndaı dárejege jettim. Ortalyq ashyp, óz aldyma bıznesimdi bastasam da, áli kúnge deıin palata mamandarynan keńes alyp otyramyn. Olar qaı ýaqytta barsam da, habarlassam da tegin keńes berýge daıyn», deıdi ortalyq jetekshisi.
Veneranyń aıtýynsha, jańa oqý jylynan bastap ortalyq oqý baǵdarlamasy negizinde tolyq jumys isteıtin bolady. Ol aldaǵy ýaqytta «Darabala.kz» baǵdarlamasy negizinde jumys júrgizý tásiline kóshýdi de oılastyryp otyr.