Aqtóbe oblysynda UBT tapsyrý 25 mamyrda bastaldy. Synaq tapsyrýdyń eń sońǵy kúni –12 shilde. О́ńirdegi 321 orta mekteptiń 11-synybyn 9 236 túlek aıaqtady. Oblystyq bilim basqarmasynyń habarlaýynsha, negizgi UBT-ǵa tirkelý 6 mamyrda bastalyp, oǵan 8 342 túlek (barlyq mektep bitirýshilerdiń 90,2 %-y) eki ret test tapsyrýǵa 16 556 ótinish bergen. О́tken jyly mektep bitirgender men kolledjderdiń 994 túlegi (tolyq oqý merzimine) jáne qysqartylǵan oqý merzimine túsetin 289 kolledj túlegi UBT tapsyrýǵa kiristi. Jeksenbini eseptemegende, 12 shildege deıin ár aptanyń alty kúninde testileý ótedi.
О́ńirde eki test ótkizý pýnkti ashylǵan. Onyń biri – oblys ortalyǵyndaǵy Eset batyr kóshesi, 107/2 mekenjaıynda, ekinshisi Shalqar qalasyndaǵy Á.Jangeldın kóshesi, 89A mekenjaıynda ornalasqan jekemenshik «Ustudy» test ortalyqtary. «Ustudy» test ortalyǵy Aqtóbede 231, Shalqar qalasyndaǵy ortalyq 49 orynǵa negizdelgen. Testileý ortalyǵynyń dárishanalary men dálizderi beınebaqylaý júıesimen jabdyqtalǵan. Aqtóbedegi ortalyq bir kúnde eki lekpen 560 túlekti synaqqa kirgizip jatyr. Ulttyq testileý ortalyǵy mamandarynyń toby qazir Aqtóbede qyzý jumysqa kirisken. Uıymdastyrýshylar tańerteńgilik ýaqyttan bastap testileýge tyıym salynǵan zattardy alyp kirmes úshin metall izdegishtermen tekserip kirgizip, synaq barysyn beınekameralardan baqylaıdy. Ázirshe zańbuzýshylyq tirkelgen joq. Alǵashqy eń joǵary upaı jınaǵan aqtóbelik oqýshy tirkeldi. Ol qaladaǵy M.Qurmanǵalıeva atyndaǵy №32 gımnazııa túlegi, «Altyn belgige» úmitker – Aıshat Saǵynaeva. Aıshattyń jınaǵan baly – 137.
Bıyl da UBT-daǵy eń joǵary ball – 140. Oǵan qosa synaq tapsyratyn pánder sany ózgerissiz qaldy. «Oqý saýattylyǵy» jáne «Matematıkalyq saýattylyq» pánderinen tapsyrmalar sany 5 suraqqa qysqarsa, kerisinshe beıindi pánderden suraq sany 70-ke deıin artqan.
Aqtóbe oblysy