Bul fotony saqtap, urpaǵyna amanattaǵan jan – Gúlnar Haıretdınqyzy Bolǵanbaeva (1927-2008). Iá, áıgili Alash qaıratkeri Haıretdın Bolǵanbaıdyń perzenti. «Halyq jaýynyń» qyzy atansa da, keńes zamanynda adal eńbegimen «Lenın» ordenin alǵan ardager ustaz. Uzaq jyl Qorǵaljynnyń Sabyndysynda mektep dırektory boldy.
Osy kisiniń anasy Rahıma Ǵalıakbarqyzy Aqmola qalasynyń qalyptasýyna atsalysqan kópes Halfın áýletinen edi. Rahıma Halfınanyń jas kúninde ulttyq kıimdegi sýreti qaıratker О́zbekáli Jánibektiń «Eho» (Jańǵyryq) atty jınaǵyna engen.
Bul eski sýret HH ǵasyr basynda Aqmola qalasynda túsirilse kerek. «Cabinet Portrait» ataýy sol shaqta fotografııa markasy men stıliniń Eýropadan jetkenin ańǵartady.
Marqum Gúlnar Haıretdınqyzynyń aıtýynsha, túregep turǵan – naǵashy aǵasy Syzdyq Halfınniń jubaıy. Al otyrǵan ekeýdiń sol jaǵyndaǵy qazaqy kelbetti hanym – Mástýra Abylaıqyzy (bul Abylaı – áıgili aǵa sultan Qońyrquljanyń uly). Ol – Ǵalıakbar Halfınniń áıeli, ıaǵnı Gúlnar Haıretdınqyzynyń naǵashy ájesi.
Halfın áýletiniń kóbi baqıǵa kóshkende Aqmolanyń eski qorymyna qoıylǵan. Han Kene sarbazdary, Alash qaıratkeri Smaǵul Sádýaqasuly, t.b. tulǵalar súıegi jerlengen «Qaraótkel» zıraty bas qalanyń Baıqońyr aýdany («Jastar» shaǵyn aýdany) aýmaǵynda tur.
Búginde Astanada esimi kóp atalmaıtyn kópes Halfın áýleti Alash qozǵalysyna edáýir qarjy bólgen. 1-gıldııaly kópes Ýálı Halfınnen taraıtyn Syzdyq, Ábdirahman, Ǵalıakbar Qytaıdyń, Buharanyń, Túrkistannyń, Reseıdiń túkpir-túkpirimen saýda-sattyq jasap, Aqmolanyń ekonomıkasy men mádenıetin kótergeni arhıv derekterinde hattalyp tur.
Elorda Arqa tósine kóshkenge deıin eski ortalyqta osy áýlettiń qos qabatty birneshe úıi turdy. Ol ǵımarattar bolshevıkter kelgende túrli mekemege berilgeni málim.
Sabyr ShÁRIP,
PhD