Kitap – ǵalamnyń ǵajaıyby. Muny Maksım Gorkıı aıtqan. Osy ǵajap dúnıeniń álemde san túri bar. Juqasy, qalyńy. Tipti ishinde eshteńesi joq kitap ta jurtshylyqtyń kóńilinen shyǵypty.
Bir suhbatynda Bernard Shoýǵa «Siz ózińizben birge adam turmaıtyn aralǵa qandaı 5 kitap áketer edińiz?» degen suraq qoıylypty. Sonda ol «ishinde» eshteńe jazylmaǵan 5 kitap alar edim dep jaýap bergen. Bul oıdy 1974 jyly amerıkalyq «Harmony Books» baspasy ilip alyp, 192 bos betten turatyn «Eshteńesi joq kitapty» shyǵardy. Kitap ataýyn alǵan shyǵarylym halyqtyń yqylasyna bólenip, qaıta-qaıta basylǵan.
Mektepke aparar jol
Kezinde úıdiń úlkenderi mektepke qalaı barǵandaryn aıtqanda ertegideı kórýshi edik. Ondaı qym-qıǵash joldar qazir de bar. Al Kolýmbııa balalary mektepke jolmen emes, bolat kabelder arqyly jetedi eken.
Kolýmbııanyń keıbir taýly aımaqtarynda turatyn balalardyń mektepke qatynaýy qıyn. Biraq eresekter bir aıla tapqan kórinedi. Taý basyna úlken dińgek qadap, bolat kabelder júıesin jasaǵan. Kabeldiń ekinshi ushy qıyrda. Mektep te sol jerde. Osylaısha, oqýshylar ózenderdi, jartastardy basyp ótip, bilim ordasyna jetedi. Mysaly, siz kórip turǵan sýrette 9 jasar qyz 65 km/saǵ jyldamdyqta kabelmen tómen qaraı quldılap bara jatyr.
Qaıyrymdy Pocho
Jer sharyndaǵy barsha tirshilik ıesi bir-birimen tyǵyz baılanysty. Ásirese adam men janýar dostyǵyn jıi kezdestiremiz. Dese de qoltyraýyn men Gılberttiń 20 jylǵy názik baılanysyn estigende, tańǵaldyq.
1991 jyly Kosta-Rıka azamaty Gılbert Shedden ózen jaǵasynda jatqan jaraly qoltyraýyndy kóredi. Sol kózi shyqqan, jaralanǵan janýardyń hali múshkil edi. Jigit qoltyraýyndy qaıyqqa salyp, úıine alyp ketedi. Alty aı boıy kútim jasap, emdeıdi. «Pocho» dep at qoıady. Arada birshama ýaqyt ótip, Pocho jazylady. Gılbert ony ózenge aparyp, baıyrǵy tirshiligine jibermek bolǵanda qoltyraýyn artynan úıge erip keledi. Sóıtip, meıirimdi jigittiń úıine jaqyn toǵanda ómir súredi. Olar kún saıyn birge júzip, oınap, qyzyqty ýaqyt ótkizedi. Adamǵa úıirsek qoltyraýyn 2011 jyly óldi desedi.